May 2022-ah hripui vei mi 883; Chhuahtir mi 1,424; thihpui mi 2

Kumin May thla chhung khan Mizoramah Covid-19 vei mi 883 hmuh chhuah a ni a, April 2022-a hmuh chhuah 2,931 aiin 2,048-in a tlem zawk. Hripui vei dam tawh mi 1,424 chhuahtir an ni a, hripui vangin mi pahnih an thi.

ISDP, Mizoram chhinchhiah danin, May 2022 chhunga Covid-19 positive hmuh chhuah mi 883 chu chawhrualin ni tin mi 28.48 an awm ang a ni a, positivity rate chawhrual chu 9.06% a ni.

Thla hmasate aiin positive hmuh zat leh positivity rate tlahniam viau tawh mah se, WHO-in Covid-19 léng thununna hmuna a ngaih chin 5% aiin a la sang hle a; positivity rate hi kuminah chuan

January-ah 19.75%, February-ah 25.16%, March-ah 15.27% leh April-ah 12.74% a ni. May 2022 chhungin swab sample 9,747 endik a ni a, April thlaah 23,010 leh March thlaah 64,611 endik a ni. May thlaa Covid positive hmuh tam ber ní, ni 2 leh ni 13-ah mi 63 ve ve hmuh chhuah a ni a; mi 50 aia tam hmuh chhuah ṭum ni thum chiah a awm. Positive hmuh tlem ber ní, ni 29-ah mi pasarih chiah hmuh a ni a, hei hi April 11, 2021-a mi pasarih hmuh chhuah hnua hmuh tlem ber ní a ni.

Hripui vei dam tawh May thlaa chhuahtir zat chu mi 1,424 an ni a, positive hmuh zat aiin 541-in a tam zawk. Chhuahtir an tam ber ní, May 2-ah mi 255 chhuahtir an ni a, chhuak an tlem ber ní May 15-ah mi pasarih chhuahtir an ni.

May 2022 chhung vekin Covid-19 vei zinga mi pahnih an thi a, ni 2 leh ni 20-ah mi pakhat ve ve an thi. Kumin April thlaah mi 11, March-ah mi 28, February-ah mi 47 leh January-ah mi 65 an
thi thung.