KHAWTHLIR

MCC Principal
Mizoram Christian College principal thar Dr Tawnenga chuan nimin aṭang khan principal kal chhuak Rev.Dr Lalchungnunga hnen aṭangin MCC principal mawhphurhna a la ṭan. Mawhphurhna inhlanna hun hi Synod executive secretary Rev. VL Luaia Hrànleh leh Family Guidance and Counselling Centre director Rev. Lalsangbera ten an hmanpui. MCC hian 2022-23 academic session atan BA, BBA leh Commerce-ah first semester admission an hawng mek a ni.

Thisen pe
Republic Higher Secondary School NSS chuan nimin khan Civil Hospital, Aizawl Blood Bank-ah thisen pek an huaihawt a, thisen unit 29 pein, petute mipa 24 leh hmeichhia panga an ni.

LCS-ah thing phun
Commerce & Industries (Commerce Wing), Mizoram Police, Custom department leh 8th Assam Rifles-te chuan nimin khan Zokhawthara Land Custom Station (LCS)-ah hnatlangin thing an phun. Hnatlangah hian mi 50 vel an tel a, Champhai DFO-in an pek thing ṭiak 70 chu Land Custom Station leh a chhehvelah an phun a ni.

Pass-te lawmpui
Mizo Students’ Union leh MNF ṭhalaite chuan thuchhuah siamin, MBSE-in HSSLC Examination 2022 result May 31, 2022-ah felfai taka an tichhuak chu lawmawm an tih thu leh MBSE-a thawkte fakawm an tih thu an tarlang a; pass-te an lawmpui rualin, pass lote chu beidawng loa zir zel turin an chah.

Hnathawh enfiah
Khawzawl bawrhsap CC Lalchhuangkima, Khawzawla UDPA officer, Khawzawl District Football Association hruaitute leh khawtlang hruaitute'n May 31, Thawhlehni khan Mualvawm Field-a pavillion sak mek leh a panna kawng siam mek an enfiah a; rang taka zawh a nih theih nana hmalak ṭulte a hmuna enfiah a, hmalak zel dan tur an sawiho. DC chuan, ram leh hnam tana rotlinga siam turin hna thawktu leh viltute a chah.