Congress party-ah danglamna Nasa tak a thleng mek - MPCC

Mizoram Pradesh Congress Committee (MPCC) chuan thuchhuah siamin, May 2022 chhung khan Congress party-in ‘Ṭomir Fehchhuah’ hlawhtling taka an neih thu leh Congress party an insingsa mek a, party chhungah danglamna nasa tak a thleng mek niin an tarlang.

MPCC chuan, Ṭomir Fehchhuahah Aizawl district ṭhen hma huam chhunga Congress party block leh unit hrang hrang tlawh chhuah a nih thu sawiin, “MPCC hruaitute team 36-a insiamin, team-te’n an chan ṭheuhte hneh takin an tlawh chhuak a, Mizoram hmun hrang hrangah Congress party mite an phûr phah hle,” an ti.

MPCC thuchhuah tarlan danin, Ṭomir Fehchhuaha an thupui chu ‘Party insawhngheh leh sorkar tura inbuatsaih’ tih a ni a, ‘Ṭhat loh theih lohna báwm’ leh sorkar ṭha siam an tum tak tak thute an aupui bawk.

Congress party chuan, an party kalphung thar chu sorkar hunah chauh kalpui tum loin, tun aṭangin a takin an kalpui nghal nia sawiin, “MLA ni lai mek pangate tih loh chuan bial vil bik neih phal a ni lo a, Congress party hruaitute’n bial zawng zawng hneh takin kan vil ang a, a tling thei ngei tur mi ṭha, ram leh hnam hmangaih tak taktu candidate ṭha tak a hun takah siam a ni dawn. He kalphung thar hmang hian sum leh pai hmanga inlei tlin tumna awm ṭhin kan nuaibo theih ngei kan ring tlat a ni,” an ti.