UDPA hnuaiah project 1,045 a awm mek

Governor Hari Babu Kambhampati chuan nimin khan Raj Bhavan-ah Urban Development & Poverty Alleviation (UDPA) department hotute a kâwm. UDPA hnuaiah cheng nuai 500 aia tam sênna tur project lian pakua leh nuai 100-500 sênna project 12 bakah, project tênau 1,024 a awm mek thu tarlan a ni.

Governor chuan, UDPA hnuaia hmasawnna ruhrel siam mekte chu mipuiin an chhawr ṭangkai thuai theih nan ṭan la sauh sauh turin thawktute a chah a; Pradhan Mantri Awas Yojana (Urban) kalpui dan chu a ṭha tâwka a hriat thu a sawi rualin, sorkarin department hnena sum a pek veleh khawmuang loa hna thawh nghal a ngai nia a hriat thu a sawi.

Inkawmnaah hian UDPA, SIPMIU leh PMAY(U) hnuaia hmalaknate leh an thlen chinte a lem nen enhoa sawifiah a ni a, an sawiho nghal.

Tarlan danin, Swachh Bharat Mission(SBM) hnuaia hmalaknaah khawpui 23-te chu pawna inthiar awm lohna, open defecation free (ODF) town atan Ministry of Housing and Urban Affairs (MoHUA)-in a puang tawh a; ODF Plus-a puan a nih theih hmalak mek a ni.

PMAY(U) - Housing for All hnuaiah hamṭhatna dawngtu 38,668 an awm a, chu’ng mite in sakna tur hmun 27,731 chu Geotag-a chhinchiah tawh a ni. Hamṭhatna dawngtu zinga mi 2,928-in in an sa zo tawh.