Thu dik loa bul ṭan a tlo ngai lo - MNF Treasurer

MNF treasurer K Vanlalauva chuan, roreltu nih tuma thu dik loa bul ṭan a tlo ngai lo tih sawiin, “Mawng lang renga bihrûk ang a ni,” a ti.

K Vanlalauva hian May 31, Thawhlehni khan Lungdai YMA Hall-a MNF Tuirial East Block political training-ah thu sawiin, ZPM party chu sorkar turin mipuiin an ring lo niin a sawi a, “Leader-a an buai thu hi ‘Pán loah tho a fu ngai lo’ an tih angin phat rual a ni lo. Roreltu nih tuma thu dik loa bul ṭan hi a tlo ngai lo,” tiin, ZPM chu kohhran hminga campaign ṭhin, an sawi loh anga awm zel, MPF pawhin an khak tawh niin a sawi.

Congress leh BJP hruaitu ni mekte chu MNF chhûlchhuak an ni deuh vek a, ZPM Leader ni mek pawh MNF a lo ni tawh tih sawiin K Vanlalauva chuan, “Delhi tlánga AAP an kal vung deuh avanga he laia lo din tum ve hi a fuh a rinawm lem lo. Central-a thâwk chhuah harsat em em tur, central lama an party chaknaa innghat Congress party hruaitute fin mah mah avanga hruaitute inkar zau site chungah rinna nghah a harsa ang,” a ti.

Bialtu MLA K Laldawngliana pawhin thu sawiin, Pathiana innghat tlat tur leh taima leh rinawm taka party inkaihhruaina zâwm chunga ram leh hnam tana thawk zel turin an party mipui a fuih a ni.