Central YMA leh Hachhek Bial Kuhva Chingtu Pawl inberem

Hachhek Bial Kuhva Chingtu Pawl (HBKCP) hruaitute leh Central YMA hruaitute chu May 31, Thawhlehni khan CYMA Office-ah an inkâwm a, Myanmar kaltlanga dan loa kuhva lak luh chungchang leh chumi avanga Mizorama kuhva chíngtute'n harsatna an tawh dante sawihoin, an inberem thawkhat.

CYMA-in Chief Minister hnena lehkha an thehluh tawh, Myanmar aṭanga kuhva rah lak luhah chhiah tihhniam an rawtna chu hnûk kîr turin HBKCP chuan an ngen a, an ngenna chu CYMA chuan an tihhlawhtlinsak theih thu an hrilh nia thu dawn a ni.

Kuhva chíngtute'n harsatna an tawh mek chu Chief Minister aṭanga hmalak a nih theih nan CM dawr an rel a, CM an hmuh theih nan appointment dil chu CYMA kutah an dah. Mizoram leh Assam chief minister-te a rang thei ang bera an inbiak theih nan hmalakho an remti bawk.

Central YMA hruaitute chuan, a theih chin chinah Hachhek biala kuhva chíngtute harsatna chu HBKCP-te nen ṭang tlangin sorkar thuneitute hnenah thlen a, harsatna sutkian a nih theih nan hmalakho turin thutlukna an siam a ni.

HBKCP chuan, Mizoram khawthlang lama kuhva chíngtute harsatna tawh mek chu a rang thei ang bera sutkiansak turin Mizoram sorkar an ngen tak meuh tih an sawi a; sorkar aṭanga thu lawmawm an hriat lawk loh chuan India President hnenah an harsatnate thlen mai an tum thu an sawi bawk.