Covid-19 vei enkawl lai an tlahniam zel

Mizoramah Covid-19 vei enkawl lai awm zat a tlahniam tial tial a, nimin tlai khan mi 108 chiah awmin, chu chu positive hmuh tawh zawng zawng 2,28,336 aṭangin 0.04% chiah a ni.

May 31, Thawhlehni khan Mizoramah Covid-19 vei mi 19 hmuh chhuah a ni a, positivity rate 8.37% a ni. Nimin khan hripui vei dam tawh mi 17 chhuahtir an ni a, Covid-19 vanga thi an awm lo a, a záwnin ni 12 chhung thi an awm tawh lo.

Thawhlehnia Covid-19 positive hmuh tharte chu mipa paruk leh hmeichhia 13 an ni a; ZMC RT-PCR laboratory-a hmuh chhuah pakhat leh RAT hmanga hmuh chhuah 18 an ni.

IDSP record angin, Mizoramah Covid-19 vei 2,28,336 hmuh chhuah a ni tawh a, mipa 1,06,308 leh hmeichhia 1,22,028 an ni a, mipa aiin hmeichhia 15,720-in an tam zawk. Nimin tlai dar 5 thleng khan mi 2,27,530 (99.65%) chhuahtir an ni tawh a, mi 698 (0.31%) thi tawhin, enkawl mek mi 108 (0.04%) an awm.

Nimin tlai dinhmun angin, Mizoramah hripui vei enkawl lai tamna ber Aizawl district-ah mi 32 an awm a, district pahnih - Siaha leh Lawngtlai district-ah hripui vei an awm tawh rih lo.