Kum 2018 inthlanah MPF-in khauh zawka kal tum

Mizoram People Forum (MPF) hruai­tute chuan nimin khan Aizawl Press Club-ah thuthar thehdarhtute kâwmin, inthlanna thianghlim leh felfai a awm theih nan khauh zawka hma an lak dawn thu an puang a; Mizoram innghahna lungphùm chu Chanchin Ṭha a nih thu an sawi.

MPF president Rev. Lalzuithanga, Synod moderator chuan, Mizoramah inthlanna thianghlim leh felfai a awm theihna atana kum 2008 aṭanga din MPF hmalaknain rah ṭha a chhuah thu a sawi a, "Kum 2013-ah inremna thuthlung thlahdul deuh a ni a, tunah chuan inremna thuthlung siamṭhain, chak zawka hmalak kan tum. Kristian ram kan nih angin, Kristian taka thianghlim leh felfai taka inthlan kan duh," a ti.

Political party-te chu an thawhpui ṭha tak a nihna chen a awm tih sawiin Rev. Lalzuithanga chuan, "Political party-te hi inremna thuthlung tihlawhtling tura beisei an ni a, thui tak pawh min tihhlawhtlinsak a ni," a ti a; political party-te'n inremna thuthlung an tihhlawhtlin lohna chin a awm tih chu tlang hriat a nih thu a sawi.

Rev. Lalzuithanga chuan, Mizoram innghahna lungphùm chu Chanchin Ṭha a nih thu sawiin, "Kan politics hi Chanchin Ṭha nena inmawi a nih a ngai a, a nih loh chuan kan changkannate hi kan boralna tur a ni ang. Ram rorelna leh Chanchin Ṭha a kal kawp lo a nih chuan hmasawnna tluantling a thleng ngai lo ang," a ti.

MPF President sawi danin, MPC local forum, constituency forum leh district forum-te chu kai thoin, kum 2018-a Assembly inthlanah thianghlim leh felfai taka inthlan a nih theihna atan theihtawp an chhuah dawn a ni.

MPF general secretary Rev.Dr R Lalbiak­mawia chuan MPF thil tum te, hmalak tawhnate leh ṭan an lak zel dan turte a sawi a; "MPF thil tumte chu politics dik leh ṭha kan neih a, inthlanna thianghlim leh felfai kan neih theihna tura ṭan lak te, hmasawnna kawng dik kan zawh theihna tura mipui zirtir te, sorkar inrêlbàwlna ṭha a awm theihna tura sorkar nena thawhho te, mi tinte khua leh tui ṭha kan nih theihna tura rinawmna, dikna leh taimakna zirtir te, mipuite'n an hriat tur an hriat a, an chan tur dik tak an chan a, zahawm tak leh hlim taka an khawsak theihna tura zirtira tihchakte a ni," a ti.

Rev. Dr R Lalbiakmawia sawi danin, MPF-ah hian kohhran pawl pasarih - Presby­terian, Evangelical Church of Maraland (ECM), Lairam isua Krista Baptist Kohhran (LIKBK), Roman Catholic, Evangelical Church of India (ECI) leh Evangelical Free Church of India (EFCI)-te an thawkho a; YMA, MUP, MHIP, MTP, M.Ch.P, YLA leh LWA-te an tel bawk.

MPF adviser K Sapdanga chuan, MPF chetna avangin Mizoramah inthlanna a thianghlim phah hle tih sawiin, "Khawvel mak tih khawp inthlanna thianghlim kalpui kan tum. Kum 2018 inthlanah chuan Mizoramah ram pumah MPF active tak din kan tum a ni," a ti.

K Sapdanga chuan, kum 2018 inthlanah chuan MPF chu an khauh dawn tih sawiin, "Inremna thuthlung bawhchhiate chu kum dang ang mai maiin kan dim dawn lo," a ti a; inthlan chungchanga dan leh thawhhona thuthlung bawhchhiate chu mipui hriatah an puanzar ngei dawn thu leh a ṭul chuan Court-a an khin mai tur thu a sawi.

MPF hian March 13, 2017 khian Synod Conference Centre-ah Aizawl khawpui huam chhunga MPF hruaitute inhmuhkhawmna hun an hmang dawn a; chumi hnuah district hrang hrangah campaign an nei zui dawn a ni.