MZU-ah mipa leh hmeichhiate Intluktlânna chungchang zirho

University Gran Commission (UGC) bul­tumin, Mizoram Univer­sity-a Womens Studies Centre chuan nimin khan ni hnih awh tur, 'Gender Equality and Sustainable Development with Special Reference to North East India' tih thupui hmangin MZU Dean conference hall-ah seminar an buatsaih a, Finance minister Lalsawta'n a hawng.

Lalsawta chuan, hmei­chhiate chu hmeichhia an nih vang chauha mipa aia hnuaihnung zawk tura dan an ni ṭhin chu ngaihdan awmze nei lo tak a nih thu sawiin, "Ngaihdan siam ṭha turin leh hma kan sawn zel theih nan a seminar buatsaih a ni hi a lawmawm hle," a ti a; hmeichhiate kawng tam taka mipate aia hnufûm zawka ngaihdan a la awm ṭhin chu pawi a tih thu sawi.

Ram a lo ṭhan a, mi­hringte'n hma an sawn telh telh chuan tharum aiin thluak leh finnain pawi­mawhna a nei tam zawk zel tih sawiin, Lalsawta chuan, "Tunlai khawvelah mipa leh hmeichhiate'n hna leh thil dangah rualkhai takin hlawhtling tura theihna an nei tawh. Tharumah hmeichhiate'n mipa tluk lo ṭhin mah se, kawng dangah mipa ang bawka chak leh fei an nih avangin intluktlanna dik tak siam turin hma kan la tur a ni," a ti.

Seminar hian March 10 thleng a awh dawn a, India ram hmn hrang hrang leh Mizoram aṭangin mi 34-in paper an present dawn a ni.