CAG-in lottery an chhuina report an siama Point pawimawhte PAC-ah an la thehlut lo

Comptroller and Auditor Gene­ral (CAG) chuan, lottery an chhui chungchangah Assembly House-a CAG report pharhte zir chiangtu Pub­lic Account Committee (PAC) hnenah ngaihtuah zui atana pawimawh zual (important point) an la thehlut lo.

Vanglaini palai zawhna chhanga PAC chairman Lalruatkima'n a sawi danin, Assembly House-a report theh­luh a nih hnuah, report buatsaihtute'n point pawimawh zual PAC hnenah an thehlut ṭhin a ni. Point pawimawh thehluh aṭangin PAC chuan report buatsaihtute leh a kaihhnawih department-te thu zawtfiahin an ngaihtuah ṭhin.

PAC-in thutlukna a siam hma chuan report hi a thi lo a, Committee chuan an zirchianna aṭangin sum hman dik lo a awm chuan rûl tur te, thawktute zinga thil ti dik lo a awm chuan bàn tur te, thil dik tawk loa awma an hriat chuan report chu titawp mai turte leh thil dang hrang hrangin sorkarah rawtna an thlen thei a ni.

PAC-ah hian member-te chu INC MLA aṭangin Nihar Kanti Chakma, T Sangkunga, R Vanlalvena leh Dr Ngurdingliana te an ni a; MNF MLA aṭangin Dr K Beichhua leh MPC MLA Lalthanliana te an ni.

Lalruatkima chuan, CAG hian ngaihtuah zui atana pawimawh zualte hi thehlut mah se, ngaihtuah nghal vat theih a nih dawn loh thu a sawi a, "Committee hian a tahtawl tê têin report-te a ngaihtuah ṭhin. Chuvangin, CAG-in lottery a chhuina chungchang hi engtikah nge ngaihtuah a nih dawn sawi mai theih a ni lo," a ti.

Assembly session hnuhnung bera Finance minister Lalsawta'n, 'Comptroller and Auditor General (CAG) report Perfomance Audit of Mizoram State Lotteries'-a tarlan a nih dan chuan, Mizoram sorkarin Union Home Ministry thupek leh Lotteries (Regulation) Rules zawm a nih loh avangin Mizoram sorkarin kum 2012-13 aṭanga 2014-15 chhungin lottery aṭanga sum hmuh tur cheng vbc. 11,808.77 a hmu lo a ni.

Hetih lai hian, Finance Minister chuan thuthar thehdarhtute Decem­ber 20, 2016-a a kawmnaah, Mizoram sorkarin lottery aṭanga sum a hmuh tur ang chu a hmuh zel thu a sawi thung.

Lalsawta chuan, sorkarin a tih ṭhin ang leh agreement an neihpui ṭhin angin distributor-te'n sorkara an chhûn luh tur chu lottery draw an neih zat aṭanga chhûn luh tur chu dan bawhchhe loin minimum guranteed revenue (MGR) hmanga chhût ṭhin a nih thu sawiin, "MGR aṭanga kum 2012-13 aṭanga 2014-15 a Mizoram sorkar sum hmuh tur chu cheng vbc. 25.45 a ni a, hei hi hmuh vek a ni tawh," a ti.