KHAWTHLIR

Free clinic
Zoram Entu Pawl (ZEP) leh Chhingchhip damdawi-in (PHC) ṭangkawp chuan nimin khan nau paite pualin St. Peter's Dispensary, Chhingchhipah Prashan Mantri Surakshit Mantritva Abhiyan (PMSMA) orientation camp an buatsaih a, nau paite a thlawnin an endik. He hunah hian nau pai mi 13 leh naupang kum khat hnuai lam mi 30 vel an inentir a ni.

Film festival
Sorkar laipui hnuaia Directorate of Film Festival, Aizawl DC leh Directorate of Information & Public Relation ṭangkawp chuan nimin khan IPR Auditorium-ah 'Film Festival in Aizawl' an buatsaih ṭan a, IPR secretary B Lalthanliana'n a hawng. Film Festival hi vawiinah chhunzawm a ni dawn a, film thlan bik hrang hrangte chhuah a ni.

Heroin man
Champhaia Excise & Narcotics department-te chuan March 8, 2017 zan dar 6:30 khan Kelkang kawngah heroin gram 49 leh a neitua puh - Thangdolian (52) s/o Lianzathang, Tahan-F Group, Myanmar nia inchhál an man a, NDPS Act, 1985 tlawhchhanin thubuai an siamsak.

Siaha-ah training
Nimin khan New Siaha-a MYA Hall-ah Entrepreneurship Awareness cum Training Programme buatsaih a ni a, Commerce & Industries secretary K Zothankhuma'n a hmanpui. K Zothankhuma chuan, kut hnathawktute'n an thar chhuah hralhna lama harsatna an tawh ṭhin sorkarin a hriat thu sawiin, "Hei hi NEDP hnuaiah chuan a awm tawh loh turah ngaih a ni," a ti.

Hmeichhe inkhawmpui
Mizoram Presbyterian Kohhran Hmeichhe Inkhawmpui Lian vawi 47-na chu zanin hian Serchhip Leisekawt Field-ah ṭan a ni dawn a, naktukah rorel inkhawm neih a ni ang. Inkhawmpui thupui chu ‘I Pathian tâwk turin inpeih rawh’ tih a ni a, speaker tur chu Upa C Ngurthantluanga a ni.