Hmunphiah leina tur cheng nuai 174 Sorkarin a hrêng khawtlai - Duhoma

ZNP president Lalduhoma chuan, Mizoram sorkarin hmunphiah leina tur cheng nuai 174 a hrêng khawtlai nia sawiin, chumi vanga hmunphiah chíngtute'n harsatna an tâwk chu pawi a tih thu a sawi.

Lalduhoma hian Tuirial bial chhunga khaw hrang hrang a tlawhnaah thu sawiin, hmunphiah lei leh hralh buaipui ṭhintu, Mizoram Agriculture, Horticulture, Forestry and Marketing Cooperative Federation (MAHFED) hman tura sorkar laipuia Ministry of Tribal Affairs-in hmunphiah leina tur cheng nuai 174 a lo pek tawh chu Mizoram sorkarin a pe chhuak duh lawk lo niin a sawi a ni.

Cheng nuai 174 chu Ministry of Tribal Affairs-in a rawn pek tawh hnuah Mizoram sorkarin MAHFED hruaitute hnenah a hlan mai lo a, hmunphiah chíngtute'n a hralhnaah harsatna tam tak an tawh phah niin a sawi a, "Thla eng emaw zat an hrênsak a, March 8, 2017 khan MAHFED account-ah thun a ni chauh a, hemi hma zawng hian MAHFED-in an sum neih chhun chhuna hmunphiah an leisak hi lawmawm kan ti takzet a ni," a ti.

ZNP President chuan, hmunphiah chu ṭha zawka a chingtute'n an hralh theih nan Mizoram sorkarin support price pek belh ve se a duh thu sawiin, "Support price an pe lo mai pawh ni loin, an ta tur pawisa ngei pawh an hrên khawtlaisak duh hi pawi kan ti. Hmunphiah aṭanga Mizoram sorkarin chhiah an la hi ṭha kan ti lo," a ti a; ZNP a sorkar hunah chuan rate hre sain hmunphiah chìntir a nih dawn thu te, a ṭul angin support price pek a nih dawn thu leh, a chíngtute dinhmun a ṭhat hma chuan chhiah âwl a nih tur thu a sawi.

Lalduhoma hian Tuirial biala khaw hrang hrang - Saipum, North Hlimen, Thingthelh, Bûkpui, North Chaltlang, Lungmuat, Nisapui leh Serkhan-te a tlawh a ni.