Leilung hausakna enkawl dan zirho

Lawngtlai District Rural Development Agency (DRDA) huaihawtin, nimin khan DC conference hall-ah ram leilung hausakna enkawl dan zirhona, 'Orientation Workshop on Natural Resources Management' buatsaih a ni a, Lawngtlai DC Dr A Muthamma-a'n a hawng.

Lawngtlai DC chuan, an district mipui tam zawk chu agriculture-a innghat an nih avangin, thlai thar chhuah tam dan tur ngaihtuah bera neih a ṭul tih a sawi a, "Thingtlang mi rethei leh harsa zawkte khai chhuah nan department hrang hrang thawhho ṭhat a pawimawh a, buh leh bâl, thei leh thlai thar chhuah tam nan tui lak ṭha leh ram leilung enkawl uluk a pawimawh a ni," a ti.

Lawngtlaia DRDA project director R Lalremsanga chuan, hmasawn duh vanga ram leilung hausakna kan chen nasat avangin a chereu chak tih a sawi a, "Rualkhai leh daih rei zawka hmasawnna hna kan thawh theih nan ram leilung hausakna hi enkawl uluk a ṭul a ni," a ti.

Workshop hian a tum ber chu, ram leilung hausakna - ramngaw, thing leh mau, lui tui leh leiṭhate uluk taka enkawl a, a chhe tawh leh hman tlak tawh lote pawh siam ṭhata chei ṭhat leh dan tur leh a pawimawhnate hriat chian a ni.