MR dahnghehna quota 35%-ah tihsan duh

National trade Union of Mizoaram (NTUM) chuan thuchhuah siamin, sorkara muster roll-a thawkte a ngheta dah tura quota an neih, 25% chu 35%-a tihsan an duh thu an tarlang.

NTUM chuan, "Kum 2000 gazette-a MR Regularisation kha a rei tawh bakah, order chi dangin a chhilh tam tawh avangin, ennawn leh ni tawh se, sorkar tana kum tam tak thâ lo sêng tawhte hamṭhatna lam hawiin siam ṭhat ni ve tawh rawh se. MR quota 25% hi 35%-ah tal min dah chhohsak ve rawh se," an ti.

NTUM chuan, MR Re­gularisation-a educa­tional qualification ngaih­hnathiamna leh gazette-a kum 7 chin dah ngheh theih tih chu kum 5-ah tihhniam ni se an duh thu an tarlang a; Labour Court pawh sorkarin sum leh pai sêng vak loa a siam theih a nih avangin a rang thei ang berin siam se an duh thu an sawi.

MR-a lut turin exam leh DPC paltlang vek a ngaih tawh avangin, MR dinhmun leh hnathawh dan tur tihchian nan mannual/guidelines/rules sorkarin siamsak se an duh thu te, Labour Law (Central Act) chu a taka hman ve tawh an duh thu leh overtime allowances, maternity benefits, etc. te chu a taka hman ve tawh an duh thu te, skill sang zawnga kaisan dah kalphung fel zawk neih an duh thu te, casual leave/sick leave-te neih ve tawh an duh thu te, MR-te hlawh tur wages head-a dah an duh thute an tarlang bawk.