LADC-a inrawlh turin Governor ngen

MNF general headquarters chuan an general secretary R Rohmingliana hmingin nimin khan Governor Lt.Gen. Nirbhay Sharma hnenah lehkha an thehlut a; Lai Autonomous District Council (LADC) chungchanga inrawlh tur leh, India danpui anga dik taka thil tih a nih theih nana hma la turin an ngen.

MNF hian Larsap hnenah hian LADC-a Congress sorkar buai vanga executive member (EM) paruk leh Planing Development Vice Chairman-te'n an nihna an bànsan thu kal zelah, Mizoram Chief Minister-in caretaker ang chauha Chief Executive Member ni lai a ruat dan leh hna thawk thei loa a siam chu India danpui palzûtna a nih thu an thlen a ni.

MNF chuan, "CM-in an party chhungkaw buaina ṭhelhmih a tumnaa 6th. Schedule bawhchhiaa hma a la hi sûttir tur leh tun hnuah Mizoram sorkar chu India danpui hnuaia dik taka rorelna kalpui tawh tura hrilhhre turin Larsap hnenah ngenna siam a ni," an ti.

LADC CEM VL Hmuaka chu House-ah no confidence motion hmanga paih a ni lo tih sawiin MNF chuan, "Congress chhungkaw buaina ṭhelhmih tum vanga India danpui bawhchhiaa CEM thuneihna chhuhsak a ni hi kan duh lo tak zet a, Larsap thuneihna CM Pu Lal Thanhawla’n chuhpuia hetianga hma a la ta mai hi kan ngai thiam lo hle," an ti a; Congress party buaina vanga LADC sorkar hun rei tak chhung a kal mumal thei lo chu Lai mipui hmuhsitnaa an ngaih thu an tarlang.

MNF-te hian Governor hnena lehkha an thehluh copy chu India President hnenah an thawn bawk.

LADC sorkara member of district council (MDC) 11-te chuan CEM ni lai VL Hmuaka an duh loh avangin February 9, 2017 khan nihna an chelhte aṭanga bànna LADC CEM hnenah an thehlut a ni.

Bânna thehluttute hi EM ni lai paruk - T Zakunga, C Lalneihkhuma, C Sangchhunga, Laltlawmlova Chinzah, KC MS Dawngliana leh L Lawmkima te, Planning vice chairman C Lallungmuana, adviser to CEM JC Ngurluaia, deputy chief whip K Vanlalsanga, Town Committee chairman N Sangnawni leh deputy chairman Suresh Chakma te an ni.

Bànna thehluttute'n an bàn chhan an sawi dan chu, LADC rorelna a hlawhchhama an hriat vang te, House-ah leader-in an party a mualphopui ziaha an ngaih vang te, excutive meeting leh CLP meeting-ah CEM a mutthilh ṭhin vangte leh CEM-in elected member aia official-te a ngaih pawimawh zawk vangte a ni.

LADC-ah hian thlan tlin MDC 25 an awm a, ruat seat-ah member pathum an awm. MNF-in MDC pariat an nei a, member dang 20 chu Congress party mi vek an ni.

MDC 13-te chuan Revenue chang mektu EM T Zirkunga chu CEM atan an duh nia sawi a ni. Hetih lai hian, T Zirkunga hi EM (Revenue) a nih laia ram a pek danah Anti Corruption Bureau (ACB)-in an chhui nia thu dawn a ni bawk. T Zirkunga chhui a nih tur thu hi chief minister Lal Thanhawla chuan February 21, 2017 khan a pisaah thuthar thehdarhtute hmaah a lo sawi tawh a ni.