AMC-in 2017-18 budget Rs. 53,49,11,400 an pawm

Aizawl Municipal Corporation (AMC) Board of Councillors (BoC) chu March 8-9, 2017 chhung khan AMC Meeting Hall-ah an ṭhukhawm a; March 9 khan kum 2017-18 budget atan Rs. 53,49,11,400 an pawm.

AMC BoC meeting hi Aizawl mayor PC Lal­hmingthanga'n a kaihruai a; sorkar kum kal mek, 2016-17 ah sorkar aṭanga sum hmuh belh tur awm nia hriat a nih avangin kum 2016-17 budget chu ennawn a ni a, revised budget estimate-a sum ruahman chu a pumpuiin Rs. 61,11,18,000 a ni. A hmaa 2016-17 budget an lo pass tawh aṭanga revised estimate punna chu Rs. 8,44,56,000 a ni.

AMC BoC meeting chuan, Chaltlang North Local Council chu Chaltlang Lily Veng Local Council tia thlak an remti a; SIPMIU-in khawpui chhung bawlhlawh paihna tur motor 54, AMC pek a tum chu a nih ang anga pawm phawt an remtih bakah, chumi atana Management Committee din an rem ti.

An thurel dang zingah, Bungkawn Vengthara lir­thei hûnna area 15-na nuaibo te, Municipal Accounts Committee din thar te, (member atan Rosiamngheta, R Zo­muan­puii, Zodingpuii, K Romawia leh R Lalbiak­thanga), Property Tax tling khawm zinga 80% chu mipui tana hmante a tel.