Kum tawp dawna sum draw vak Kan phal tawh lo - KS Thanga

Parliamentary secretary (Finance) KS Thanga chuan, sorkar kum tàwp dawna sorkar department-te'n sum an lak chhuah (draw) vak vak ṭhin chu phal a nih tawh loh thu a sawi.

KS Thanga hian nimin khan Congress Bhavan-ah thu sawiin, "Sorkar kum tawp dawna sum draw vak vak ṭhin kan phal tawh dawn lo. Department-te'n sum lak chhuah hman loh an neihte chu K-Deposit-ah kan dah ang a, a ṭul hunah kan pe chhuak mai ang. Sum tam tak kum tawp dawna lak chhuah hian an hmang zo dawn lo a, department-a sum tak tak a awm hian eirukna a thlen a hlauhawm," a ti.

Mizoram sum dinhmun chu a lungawithlak tih sawiin KS Thanga chuan, "Hun eng emaw chen sum dinhmun siamṭhatna atan kan hmang a, tunah chuan kan sum dinhmun a ziaawm tawh," a ti a; sorkar kum thar aṭang chuan hmasawnna hna thawh lamah sorkar a kal na deuh tawh tura a ngaih thu a sawi.

Parliamentary Secretary chuan, Mizoram sum dinhmunin ziaawm lam pan mah se, sum leh pai enkawl kawngah inthlahdah a thiang lo tih sawiin, "Sum kan thawh chhuah tlem avangin ren lo taka kan hman pur pur chuan kan tlachhe vat ang. Inren reng chungin, hmasawnna hna thawhna tur chu kan nei tawh a ni. Tun hma anga sum harsatna a awm tawh lo," a ti.

KS Thanga sawi danin, Mizoram sorkarin hun eng emaw chen a hnathawkte hlawh pek theih loh ṭum a nei tawh lo a, sorkar laipuiin an hlawh a tum sakte zingah erawh hlawh la thei lo an awm. Ways & Means hmanga RBI aṭanga sum pûk a ngai tawh ngai lo a, K-Deposit-a sum dah pawhin hniam lam a pan zel a ni.

Sorkar hnathawkte GP fund pawh an pek chhuah ṭhat thu sawiin KS Thanga chuan, "Sorkar kum kal mekah GP fund atan hian cheng vbc. 500 dah a ni a, tun dinhmunah chuan hei aia tam daih vbc. 600 vel pek chhuah a ni tawh," a ti.