KHAWTHLIR

Free clinic
Indian Medical Association (IMA) Mizoram Branch leh Mizoram Govt. Doctors Association (MGDA)-te chuan March 9, 2017 khan Zawlnuam damdawi-inah Zawlnuam leh a chhehvel mipuite tan special clinic an buatsaih. He free clinic-ah hian doctor 17 leh thawktu dang 12 an harsatna chi hrang hrang nei mi 1,412 an inentir a ni.

Sorkar ngen
MUP Mamit area conference tun hnaia neih chuan, Mamit tui lakna kawng, Mamit-Phaizau kawng chu fûr laiin motor a luh theih loh avangin diesel phurh theih a nih ṭhin loh avangin tui pump khawl a chhiat chángin Mamit khawpuiin an tuar nasat ṭhin thu an tarlang a; kawng hi kumin chhung ngeia blacktop turin sorkar an ngen.

Rûl chanchin
Dr HT Lalremsanga leh Dr Samuel Lalronunga te lehkhabu buatsaih, 'Mizoram rûl chanchin' tih chu nimin khan IPR directorate conference hall-ah minister Lalsawta'n a tlangzarh. Lalsawta chuan, lehkhabu a tlangzarh tâk aṭang hian Mizorama rûl hmuh ṭhinte an hlauhawm leh hlauhawm loh te, túr nei an nih leh nih lohte hriat theih a nih tur thu a sawi.

Thing phun
Social Welfare department hnuaia State Resource Centre for Women (SRCW) leh Laipuitlang Local Council ṭangkawp chuan, nimin khan Laipuitlangah thing an phun. He programme hi sorkar laipuiin Swacch Bharat Mission a kalpui mek bawhzuina a ni a, state tinte kum tin chawlhkar hnih chhung faina hapta, 'Swachta Pakhwada' nei tura a tih angin kuminah chuan March 1-15 chhunga hman tum a ni.