YLA-in district páwn lam mite'n LADC-ah Ram an neih lohna atan hmalak an rêl

Young Lai Association (YLA) chuan, nimin khan Lawngtlaia CYLA Hall-ah rorel inkhawm an nei a; Lai Autonomous District Council (LADC) huam chhungah district páwn lam mite'n ram an neih theih lohna atan hmalak an rêl.

Rorel inkhawm kaihruaitu CYLA president J Sangthangpuia chuan, "YLA-te hi ram leh hnam tana ding kan ni a, kan ram himna turin theihtawp kan chhuah zel tur a ni. Tlawmngai pawl kan nih ang takin tlawmngaihna pawh vawng nung zel turin theihtawp kan chhuah zel a ngai," a ti.

CYLA hnuaiah hian branch 105 awmin, member 20,000 chuang an awm a; rorel hi Lawngtlai-III YLA Branch-in an thleng a, palai 101 an tel. Rorel inkhawm hi general conference neih loh kumah neih ṭhin a ni a, conference hi kum khat danah an nei ṭhin. Kumina YLA budget atan Rs. 2,64,300 an pawm a ni.

YLA thurel Ṭhenkhatte
1) Hlukhla Kût hi LADC sorkar hian chawlhah puangin district council calendar-ah tihlan ngei ni se.
2) LADC area chhunga ram neitute'n district páwn lam mite hnenah ram hralh phal loh leh district pawn lam mite hminga ram pass thlak phal loh a nih theihna tura hmalak.
3) YLA-in ram a neihte a thlawna pass siam leh lei man âwl kan nih theih nan thuneitute hnenah hmalak ni se.