Sumdawn thiam pawimawhna zirho

Mizoram sorkar bultumin Lawngtlaia LADC Hall-ah nimin khan sumdawn thiam pawimawhzia zirhona buatsaih a ni a, Commerce & Industries secretary Zothankhuma'n a hmanpui.

Zothankhuma chuan, Mizoram sorkarin New Economic Development Policy (NEDP) duangin, chumi hnuaiah chuan mahni khamkhawp thar maia duhtâwk lo a, hralh suma chantir tham thar chhuaha siam chhuah tuma hma a lak mek thu a sawi a, "Ram pum huapa sumdawn thiamna zirtir tur leh kaihruai turin Mizoram State Entrepreneurship Development Monitoring Committee din a ni a, hemi hmang hian sumdawngte chawi kân a, sumdawng tura zirlai leh ṭhalai a tam thei ang ber chher tum a ni," a ti.

Inkhawm kaihruaitu, Lawngtlai DC Dr A Muthamma chuan, mi tinin sorkar hna an thawh theih loh avangin mahni kea ding tura sumdawn thiamna neih a pawimawh thu a sawi.

Zirhonaah hian Mizoram sorkar leh LADC official te, NLUP leh PMEGP beneficiary te, sumdawngte leh zirlaite an tel a ni.