Mizorama siam grape wine khap leh khap loh thuah MKHC-in 'aw' a nei lo

Mizoram sorkarin Mizorama siam chhuah grape wine a khap leh khap loh chungchangah Mizoram Kohhran Hruaitute Committee (MKHC) chuan sorkarah 'aw' an nei lo a, chutih rualin, zu zawrh ṭha an tih loh thu an thlen thung.

MKHC secretary Rev. R Lalrin­sanga'n Vanglaini palai zawhna chhanga a sawi danin, Mizoram sorkarin zu khapna dan The Mizoram Liquor Prohibition Act a kalpuina tur Rules siam dan tur ngaihtuahtu committee-ah MKHC aiawh an tel a, committee-ah chuan MKHC-in ngaihdan an sawi lo a ni.

MLP Rules ngaihtuahtu commi­ttee chu January 14, 2022-ah an ṭhukhawm a, chutah chuan MKHC aiawhte pawh an tel. Mizorama grape thar hmanga wine siam khap leh khap loh chungchang sawiho a ni a, MKHC aiawhte chuan MKHC-in an la sawiho loh avangin an dinna tur an ngaihtuah phawt a ngaih thu an sawi.

Committee chu January 24, 2022-ah an ṭhukhawm leh a, chumi ṭum chuan MKHC aiawhte an tel lo. Aiawh an tel loh chhan sawiin Rev. R Lalrinsanga chuan, "Grape wine chungchangah hian member church-te ngaihdan kan hre lo a, committee-ah pawh rawt tur kan hre lo a, chuvang chuan January 24-a committee-ah hian kan tel lo a, rawtna kan thlen lo a ni," a ti.

January 24, 2022-a ṭhut­khawmah an tel lo a, ngaihdan an thlen loh rualin, zu zawrh hrim hrim ṭha an tih loh thu an thlen tih a sawi bawk.

Sorkarin grape wine siam, zawrh leh hralh a khap chung­changa mipuiin kohhran an dem chungchang zawhna chhángin Rev. R Lalrinsanga chuan, "A huatthlala hran lo. Ṭhutkhawmah tel lo mah ila, Rules ngaihtuahtu Committee-ah kan tel miau avangin," a ti.

MKHC Secretary chuan, "Chief Minister kan hmuh ṭum pawhin, kan ngaihdan kan sawi ve a ni mai a, kohhran thu thua kal tur in ni bik lo, tihte pawh kan sawi. Thutlukna an siamna turah fimkhurna tur kan sawi ve a ni mai," a ti a; MKHC chu sorkar nawr chiam tur an nih loh thu a sawi a ni.

Sakramen atan grape wine
Sakramen atana Mizorama siam grape wine hman chung changa zawhna chhangin MKHC Secretary chuan, Champhai leh Hnahlana grape wine siamtute'n MKHC an dàwr ve ve tawh a, sakramen atan an grape wine siamte hmang turin an ngen tih a sawi a; sakramen chungchangah MKHC-a tel kohhrante kalphung a inang vek lo tih sawiin, "MKHC anga inang tlanga kal a harsa a, kohhran malin an duh dan angin an kalpui turah kan ngai," a ti.

Baptist Church of Mizoram (BCM) chuan kum ruk vel kal ta aṭangin sakramen atan Hnahlan winery-a siam grape wine an hmang tawh a, ṭum hnih inremna (agreement) ziahpui tawhin, tun thlengin an la hmang mek.

Aizawla BCM executive secretary Rev. R Lalrintluanga chuan Vanglaini zawhna chhangin, sakramen atan an kohhranin Hnahlan winery-a siam grape wine an hman theih nan kum ruk vel kal ta khan Hnahlan Grape Growers Society nen inremna an siam thu a sawi a, "Grape wine-a alcohol titlem turin kan ngen a, chumi hnuah agreement kan ziak. Agreement hmasa ber chu a tàwp tawh avangin agreement kan ziak nawn leh tawh a, kar thum vel kal ta khan grape wine trip khat chu kan han la nghe nghe," a ti.

Rev. R Lalrintluanga chuan, sakramen atan Hnahlan winery-a siam grape wine an hmang chu ṭha an tih hle thu sawiin, "Cháng dang kân kan tum tawh lo. Loneitute an eizawnnaah an ngêlngheh ve theihna tura kan ṭanpui ve theihna a ni," a ti a; state dang Goa vela wine-te aiin Mizoram wine ṭha an tih zawk thu a sawi.

Chutih rualin, tunlaia Mizoram sorkar chêt dan enin, sakramen atana grape wine an hman chungchangah harsatna an neih a hlauhawm thei dawna ngaih theih a nih thu a sawi bawk.

UPC (NEI) general superintendent Rev. R Lalrin­sanga, MKHC secretary ni bawk chuan, Champhai leh Hnahlana grape wine siamte sakramen atana hman chungchangah UPC (NEI) General Headquarters anga hmalak a nih loh thu leh grape wine siamtute nen indàwrna a awm loh thu a sawi rualin, district anga hma la erawh an awm thu a sawi.

Rev. R Lalrinsanga chuan, "UPC (NEI)-ah hian district panga kan awm a, district anga lo dàwrte pawh an awm a ni mai thei a, kohhran ṭhenkhat chuan an hmang a ni. Hemi chungchangah hian inkhapna a awm lo a, an zalennaah kan dah," a ti.

Sakramen atana Mizorama siam grape wine hman chung­chang hi Mizoram Presby­terian Kohhran pawhin a lo ngaihtuah tawh a, mahse, a la tlang rih lo.

Thu dawn danin, December 2017-a Synod Inkhawmpui, Bungkawn Kohhran biak-ina neihah presbytery pahnih aṭangin sakramen atana Mizorama siam chhuah grape wine hman rawtna lut ngaihtuah a ni a; mahse, a tlang lo a, tun thlengin an la ngaihtuah nawn leh ta rih lo a ni.