Governor-in CADC ṭhiah a duh Cabinet-in ṭhiah rih loh ṭha a ti

June 1, Nilaini chawhnu khan chief minister Zoramthanga hoin Chief Minister's Office-a Cabinet room-ah Council of Minister meeting neih a ni a, Chakma Auto­nomous District Council (CADC) ṭhiah rih loh an rél.

Vanglaini thu dawn danin, Governor Dr Hari Babu Kam­bhampati chuan CADC-a MNF kaihhruai sorkarah sorkar ngêlnghet a awm thei lo a, chief executive member (CEM) leh hotu dang an inpaihthlâk reng avangin CADC sorkar chu ṭhiah mai ṭha a ti a; chumi chungchangah chuan Council of Minister ngaihdan a hriat duh avangin a ráwn a ni.

Governor-in an ngaihdan a hriat duh avangin Council of Minister chu June 1, 2022 khan an ṭhukhawm a; CADC chu ṭhiah rih loha ngaihchàn zel phawt ṭha an ti a, an ngaihdan chu Governor hnenah an thlen ve leh a ni.

CADC sorkar ṭhiah leh ṭhiah loh hi Governor thuneihna a ni a, Cabinet-in ṭhiah duh lo mah se, Governor hian a duh chuan a ṭhiat thei tho a ni.