Minister Thangtea'n sorkar laipui a dâwr

Minister Dr R Lalthangliana chu sorkar laipui hotute dawr turin May 1, 2022 khan Delhi-ah a zin a, a department chan kaihhnawiha mi pawimawh hrang hrang a dâwr.

Commerce & Industries Minister hian Land Ports Authority of India (LPAI) chairman Aditya Mishra kâwmin, tun hnaia Bangladesh Commerce minister Tipu Munshi-a’n Mizoram a tlawh ṭuma Kawrpuichhuah border trade (Integrated Check Post) an sawi dun chungchang leh border trade dinna turah rang taka hmalakna tur pawimawhte a sawipui.

Sorkar thuchhuah tarlan danin, LPAI official lam chuan DPR an peih tawh a; detailed project report (DPR)-ah passenger terminal, trade terminal building, officer & staff quarters, administrative building leh thil dang pawimawhte a tel. Ministry of Home Affairs-ah sum sanction turin an thlen tawh a ni.

DPR bawhzuiin R Lalthangliana chuan MHA hotute a kâwm nghal a, Kawrpuichhuah ICP siamna tur DPR chu rang taka enfelsak turin a ngen.

Health minister Dr Thangtea hian RIPANS-a hmasawnna hna thawh mek chungchangah hna thawktu HITES Ltd. hotute Mizoram House-ah a ko a, hna thawhna tura ruahman cheng vbc.480, kum 2020 tir lama sorkar laipuiin an rawn pek tawh chu chak taka bawhzui turin a hriattir.

Dr R Lalthangliana hian Union MSME secretary BB Swain chu a pisaah kâwmin, MSME-in guideline thar - North Eastern Region Guideline leh CDT Guideline an siam chungchang a sawipui. Inkaihhruaina thar hian Mizorama MSME hnuaia hmalakna turte chu awlsam zawk leh awmze nei deuha kalpui dan tur a keng dawn a ni.

R Lalthangliana chuan Textile secretary Upendra Prasad Singh pawh kâwmin, Bangladesh leh Mizoram insumdawn tawnna turah Mizoram tan handloom leh textile lamah kawng hrang hranga lian tham deuh hleka hmalakna tur project Mizoramin a neih thu a thlen a ni.

Dr Thangtea RUSA mission chungchanga harsatna tawh mek te, RUSA zirtirtu asst. professor te hlawh (salary) vawiin ni thlenga pending la awm chungchangte leh RUSA-3 tihhlawhtlinna tur atana chinfel ngai an la tifel thei lo chu a ngaimawh thute pawh a thlen. Murthy hian a theih anga en zui a tum thu a lo hrilh a ni.