Ramri chingfel turin Chief Minister hi inchi khat pawh a pên lo - BJP President

BJP, Mizoram Pradesh president Vanlalhmuaka chuan, ramri chingfel turin chief minister Zoramthanga chu inchi khat pawh a la pên lo niin a sawi a, “A kaihhruai MNF sorkar thil ngaih pawimawh ber chu Kamrula leh Abu Mazumdar kaltlanga sum siam a ni,” a ti.

Vanlalhmuaka hian nimin khan Kolasib Press Club-ah thuthar thehdarhtute a kâwm a; ramri chungchanga zawhna chhangin, “Kum 2019-a NEDA meeting-ah Union Home minister Amit Shah-a’n chief minister zawng zawng leh state BJP hruaitute a ko khawm a, ramri chungchang all party meeting neia lo sawi khawm hmasa tur leh kum 2023 hma ngeia ramri chinfel tum turin a chah,” a ti a; chumi hnuah harsatna a la awm a nih chuan a hnenah thlen tur leh ani’n ramri chinfelpui a tum thu Home Minister chuan CM-te a hrilh tih a sawi.

Union Home Minister-in hma a lak lai hian ramri chingfel turin Mizoram aṭangin hmalakna a awm lo nia sawiin Vanlalhmuaka chuan, “Kan Chief Minister hi ramri chingfel turin inchi khat mah a la pên lo,” a ti.

BJP President chuan, sorkar laipuiin tu mah thliar loin mipui tan scheme hrang hrang a duang tih sawiin, “Heng hi state-ah kalpui ṭhat loh chuan state sorkar mawh a ni. Housing for All (HFA) chungchangah Congress hun laia thlan tawhte chuan first instalment an dawng hman a, a hnuah MNF a sorkar khan second instalment pe loin, an mi duhsak zawngte hnenah first instalment angin an pe ve leh a ni,” a ti a; HFA chu Mizoram sorkarin a chawh buai vek avangin harsatna a thlen thu a sawi.