Botanical Garden lungphùm phúm

Environment Forest & Climate Change (EFCC) minister TJ Lalnuntluanga chuan nimin khan Champhai Zotlangah Botanical Garden dinna tur lungphùm a phúm. Minister chuan, Botanical Garden-ah zirlai leh zirbing mite tana inzirna tur hmun chhenfakawm tak siam tum a nih thu a sawi.

TJ Lalnuntluanga chuan, Champhai Master Plan ken tel eco-tourism park, cultural centre, circular road, infiamna hmunhma, industrial centre leh ruahmanna dang dang zingah botanical garden siam a tel thu a sawi a, "Champhai leh Mizoram tana chhenfakawm thama a puitlin theih nan hmalak zel a ni a, state leh central fund aṭangin bul ṭan a ni. Botanical garden hi hun rei lo te chhunga peih mai tur chi a ni lo a, a puitlin theih nan hun a duh dawn," a ti.

EFCC department hnuaia project-ah mipui tel vena ngaih pawimawh a nih thu sawiin Minister chuan, "Green India Mission kalpuiah mipuite'n neitu thinlung an puta an tel ve zel theih nan hmalak ṭhin a ni," a ti a; Botanical Garden siam turah mipui a tam thei ang ber an tel theih nan ngaihtuahna sên a ṭul thu a sawi.