KHAWTHLIR

Thisen pe
YMA, Republic Veng Branch chuan YMA Day pualin nimin khan an YMA Hall-ah thisen pek an huaihawt a, Synod Hospital tan thisen unit 54 an pe a, petute mipa 50 leh hmeichhia pali an ni.

Cyber Jagrookta
Home secretary H Lalengmawia hoin nimin khan a pisaah Cyber Jagrookta Diwas puala Home department-in cyber crime chungchanga mipui zirtirna an buatsaih tawhte an thlir lêt a, nasa lehzuala zirtirna kalpui an rêl. Hmalaknaa mawhphurhtu turte an inruat bakah, department dangte nena thawhho dan tur an sawiho a ni.

Kawng khâr dawn
Zarkawt Valley aṭanga Dawrpui Vengthar pan thlakna kawng chu June 4-6, 2022 chhungin siamṭhat a ni dawn a, hei vang hian Traffic SP Rodingliana Chawngthu chuan hna thawh chhungin kawng khâr a ni dawn tih a puang. Zarkawt Valley aṭanga Dawrpui Vengthar pan thlâkna kawngah lirthei ke pali nei tan chhuk zawngin tlân phal a nih loh thu a tarlang bawk.

Minister-in hmanpui
Ephraim Higher Secondary School chuan nimin khan Vanapa Hall-ah kumin HSLC leh HSSLC exam-a an zirlai hlawhtling leh ti ṭhate lawmpuina leh chawimawina an hmang a, IPR minister Lalruatkima'n a hmanpui. Minister chuan, taimâkna, insûmtheihna leh tumruhna nen ṭan lâk zel a pawimawh tih sawiin, "Marksheet-a mark ṭha ringawt hi an hlawhtling vek kher lo a, tumruh leh taima apiang tan khawvelah hlawhtlinna a awm," a ti.

Sangha notê hralh
Lunglei Zobawka Fish Seed Farm aṭangin nimin khan a thawh khatna atan sangha (common carp) no hralh chhuah ṭan a ni. Fisheries department hotute chuan, sangha chi dang (Indian Major Carp) no hralh tur khawi tuma an inbuatsaih mek thu an sawi.

Zirna-in tlawh
Minister of state TJ Lalnuntluanga chuan nimin khan a bial, Champhai South-a Presbyterian English Medium School Zotlang, Zotlang Comprehensive M/S leh Champhai DIET-te a tlawh. Zirtirtute chu ṭhahnemngai taka rawngbawlna thinlung pua thawk turin a chah a, an mamawhah te a ṭul ang zela hmalaksak a tum thu a hrilh.

Kabod training
Hnahthiala Kabod Training Centre-ah nimin aṭang khan UDPA department hnuaia DAY-NULM chuan puanṭhui zirna an kalpui ṭan. Puanṭhui zir tura thlan mi 30 chu a thlawn vekin zirtir an ni dawn a, an zir chhuah hunah an duh chuan bul an ṭanna tur loan ngaihtuahsak an ni dawn a ni.

Pilot project hawng
Planning department leh SIRDPR hmalaknaa thingtlang hmasawnna leh intodelhna tur, Village Level Development Programme chu nimin khan Kolasib district-a pilot project atan Lungdai khuaah bialtu MLA K Laldawngliana’n a hawng. MLA hian bul ṭanna turin Rs 5,00,000 a hlan nghal a ni.