Sialsuk PHC-a doctor chawlhtir

Damlo chunga dik lo taka chea puh Dr Linda Lalbiaknungi, Sialsuk Primary Health Centre (PHC)-a medical officer chu nimin aṭang khan chawlhtir (suspend) a ni.

Health & Family Welfare secretary R Lalramnghaka'n nimina thupek a tih­chhuaha a lan danin, Dr Linda Lalbiaknungi hi hotu lu aṭanga phalna la hmasa lo chuan Aizawl chhuahsan lo tura hriattir a ni.

Tarlan tawh angin, Dr Linda Lalbiaknungi hian canteen-ah Rs 1,000 a ti bo a, pawisa rutu-ah Sialsuk damdawi-ina damlo enkawl lai Lalrengpuia chu puhin, May 12, 2022 khan damdawi-in aṭangin a hnawt chhuaka puh a ni a; Lalrengpuia chu May 13, 2022 zanah a thi a ni. Dr Linda Lalbiaknungi chungchang chhui turin Aibawk BDO ruat a lo ni tawh bawk.