MADC sorkar duhsakna hlân

ZPM Ṭhalai chuan thuchhuah siamin, Mara Autonomous District Council-a MNF leh Congress party-te’n sorkar inṭâwm an siam chu an lawmpui thu an tarlang a, tluang taka kal turin duhsakna an hlân.

ZPM ṭhalaite chuan, MNF leh Congress party-te chu hun rei tak Mizoram lo hruai tawhtu niin, inchaltauh cháng nei mah se, kalphung inang, tum inang nei party an nih avangin sorkar inṭâwm an siam chu tih àwm tak a nih thu an sawi a, “Congress leh MNF kaihhruai sorkar inṭâwm ngêlnghet leh mipui thleng phâk sorkar a din ngei theih nan duhsakna kan hlan a ni,” an ti.

May 5, 2022-a MADC inthlanpui neih a nih hnuah MDC pakua neitu MNF leh MDC pali neitu Congress party-te’n sorkar an siam a, chief executive member H Malvina kaihhruai sorkarin May 31, 2022 khan fiahna a paltlang tawh.

June 1, Nilaini khan executive member atan mi pakua lak luh an ni a, MNF MDC paruk leh Congress MDC pathum an ni. CEM H Malvina chu Congress party mi a ni a, heti hian Congress party MDC palite chuan nihna pawimawh an chang vek a ni.