Lungleng I-in tualthihna an dem

Lungleng-I VC leh pawl hrang hrangte chuan thuchhuah inṭâwm siamin, May 29, 2022-ah an khaw nu Rosangzuali d/o Kapliana chu a pasal Zobiaksanga s/o PC Vanlalawia, Serchhip Dinthar Vengin Serchhipa an chenna inah thi khawpa kut a thlak chu rapthlak an tih thu leh an dem tak zet thu an tarlang.

Lungleng-I khawtlang chuan, Zobiaksanga chu a phû ang taka hrem ngei an phût thu an tarlang a; Rosangzuali tualthihna avangin buaina dang thleng zui lo se an duh thu sawiin, “Media lamah pawh thu belhchian dâwl lo leh mi rilru a ṭha lo záwnga hruai thei thil chhuah loh ni se la. Mi pakhat thil sual tih avanga tisual ve lo mi dang dem emaw, mawi lo taka ṭawng khum emaw hi ṭha kan ti lo a, chutiang thil chu thleng suh se,” an ti.