Zu dawrte'n chhiah pek loh an ngah ; Zu dawr 50 zinga 19-in registration an ti lo

March 16, 2015-a Mizoram Liquor (Prohibition and Control) Act hmanga zu zawrh a nih aṭanga kum hnih chhungin, Aizawl leh district hrang hrangah zu dawr 50 a awm tawh a, zu dawr 50 zinga 19 chuan Taxation department-ah registration an ti lo. Zu dawr (vendor/wineshop)-te'n chhiah, value added tax (VAT) an pe ṭha tawk lo a, bonded warehouse-te'n an pe ṭha thung.

Vanglaini-in RTI Act hmanga Taxation department-a zu kaihhnawiha chhiah pek dan a zawhna chhannaa a lan danin, Taxation department chuan Mizoram pum hi zone pakuaah an ṭhen.

Aizawl Central Zone-ah zu dawr tam berin, dawr 17 a awm a, zu dawr 12-te chuan December 2016 thleng khan VAT pek tur cheng nuai 32 chuang an pe tawh lo. Zone dang pariata zu dawrte'n VAT an pek tur an bat tling khawm pawh tam tawh hle niin an sawi.

Zu dah khawmna warehouse pathum, Siaha (hei hi Siaha mi, Aizawla warehouse nei sawina a ni), Aizawl Central Zone leh Aizawl South Zone-a mite VAT pek erawh kum hmasa aiin a pung nasa a, kum 2015-16 aia kum 2016-17 chhunga VAT an pek tamna chu cheng vbc. 84 a chuang.

Taxation department-in zone a ṭhen dan angin, zu dawr hi Aizawl Central Zone-ah 17, Aizawl North Zone-ah pariat, Aizawl South Zone-ah panga, Lunglei Zone-ah panga, Serchhip Zone-ah pasarih, Mamit Zone-ah pahnih, Kolasib Zone-ah pahnih, Champhai Zone-ah pali an awm a; Siaha Zone leh Lawngtlai Zone-ah a awm lo. Champhai Zone-ah hian Champhai Grape Grower Society pawh ziah tel a ni a, mahse, anni hian July 2016 aṭangin zu an zuar tawh lo thung.

RTI Act chhannaah hian Aizawl Central Zone chiah hriat theih rih a ni a, Central Zone chhunga zu dawr 14-te chuan December 2016 thlenga chhûtin chhiah bâ an nei vek. VAT an pek tur hi 13.5% a ni.

Zone pali aṭanga wineshop 11 chuan Taxation department-ah hian VAT an pe thung. Aizawl Central Zone hnuaia mi Mizoram Police Subordinate Canteen, Armed Veng chuan kum 2015-16 chhung khan Rs. 8,03,360 an pek laiin, kum kal mek 2016-17 ah Rs. 6,26,285 an pe tawh. MAMCO Spirit chuan kum 2015-16 khan Rs. 40,59,596 pein, kum 2016-17 chhungin Rs. 6,16,397 chiah an la pe a ni.

Two Brothers Wineshop, Vaivakawn chuan kum 2015-16 ah Rs. 1,10,291 pein, kum 2016-17 ah Rs. 49,198 an pe tawh a; Flora Wineshop, Chawlhhmun chuan kum 2015-16 ah Rs. 6,56,712 pein, kum kal mekah pek an la nei lo thung.

Aizawl North Zone hnuaiah North Wine and Spirit, Ramhlun Venglai chuan September 2015 thlengin chhiah Rs. 1,10,547 an pe a, September 2015 hnuah an la pe leh lo. Hi Time Liquor, Lower Zarkawt pawhin September 2015 thla thleng Rs. 6,29,688 an pe a, a hnu lamah an pe tawh lo.

Kolasib Zone hnuaia wineshop pali - Lersia, V-Cube, Sapphire leh Parmawi Enterprise, Vairengte-te chuan kum 2015-16 ah chhiah Rs. 2,88,086 an pe a; an chhiah pek tur zat erawh chhût fel a la nih loh thu tarlan a ni.

Champhai Zone hnuaia LR Wineshop chuan July-December, 2015 chhungin Rs. 1,19,687 an pe a, December 2015 hnuah chhiah an la pe lo. Khawzawla 2nd. IR Wineshop chuan chhiah Rs. 68,635 pe turin an buaipui mek a; Champhai Grape Growers Society-in July 2015 aṭanga June 2016 thlengin Rs. 5,16,852 an pe a, anni hian July 2016 aṭangin zu an zuar tawh lo. Champhai Vengsang Multi­purpose Society-in July 2015 aṭanga March 2016 thleng khan Rs. 3,00,259 an pe bawk.

Zu dawr neitute hian Mizoram Value Added Tax Act 2005 hnuaiah Taxation department-ah registration an ti tur a ni a, chutih laiin, zone pangaa wineshop/vendor 19 chuan registration an ti lo. Registration ti lo zinga Aizawl Central Zone hnuaia mi dawr pathum chu khârsak mek an ni a; Lunglei Zone hnuaia mi ZIDCO chu RTI ACt zawhna chhan lai hian chhût fel a la ni lo nia tarlan a ni.

Mizorama zu dah khawm­na, bonded warehouse pathumte chuan VAT an pe ṭha thung.

Aizawl South Zone hnuaia awm RTP Bonded Warehouse chuan kum 2015-16 khan VAT Rs. 8,68,76,769 an pe a, kum kal lai 2016-17 ah kum la tawp lo mah se, Rs. 90,11,32,979 pe tawhin, kum hmasaa an pek chu Rs. vbc. 81 chuangin an khûm tawh.

Aizawl Central Zone-a bonded warehouse chuan kum 2015-16 khan chhiah Rs. 97,90,116 an pe a, kum mekah Rs. 1,27,42,161 pe tling tawhin, kum hmasa aiin Rs. 29,52,045 an pe tam tawh zawk. Aizawla bonded warehouse pakhat dang chu Siaha Zone-ah an inziak lut a, anni hian kum 2015-16 chhungin VAT Rs. 5,62,01,057 pein, kum kal mekah Rs. 8,01,80,157 an pe tawh a, kum hmasa aiin Rs. 23,79,100-in an pe tam tawh zawk.

Bonded warehouse pathumin VAT an chhûn luh belhkhawm hi kum 2015-16 khan Rs. 15,28,67,942 a ni a, kum 2016-17 kal meka an pek tawh belhkhawm chu Rs. 99,40,55,297 niin, kum hmasa aia a tamna chu Rs. 84,11,87,355 a tling.