BCM Assembly a ṭiak

Mizoram Baptist Koh­hran rorelna sang ber, BCM Assembly vawi 121-na, March 9, 2017 aṭanga Lunglei Chanmari biak-ina neih chu nizan khan a ṭiak. Inkhawmpui thupui chu 'Rinawmna' tih a ni.

BCM Assembly-ah hian nimin khan chawhma inkhawmah pro. pastor thawk lai mi pathum chu pastor atan BCM president Rev. H Lianngaia'n a nem­nghet a, pro. pastor atana lak thar mi panga a nemnghet bawk. Chaw­hnu inkhawmah Lalpa Zanriah Sakramen ṭheh a ni a, zanah BCM hruaitu tharte hlan an ni.

March 9-11 chhunga rorelnaa an thu pawm zingah, Christian Hospi­tal, Serkawn tan CT Scan lei tura tih tawh chu chak zawka bawhzui leh lithotripsy machine lei te, Sap Upa leh Pu Buanga thlân chei ṭhat te, Mizorama Sap Upa leh Pu Buanga te thlen champha kum 125-na lawm te, fa nei tam tura inzirtîr kalpui a, ṬKP kuta dahte a tel.

Kum 2017-18 BCM budget atan Rs. 78,06,22,000 an pawm a, budget hi kum 2016-17 aiin Rs. 8,18,40,720 (11.71%)-in a tam zawk. Kum 2018-19 chhunga pre­sident atan Rev. Lalbiak­sanga Chinzah an thlang.

BCM Statistical Hand­book thar bera a lan danin, Baptist kohhranah hian area baptist council 14, pastor bial 83, tual­chhung kohhran 677 a awm a, chhungkua 35,467 awmin, member zawng zawng 1,72,254 an ni. Minister (pastor) thawk lai 139 awmin, minister pension tawh la dam 38 an awm a; pro. pastor 19 leh kohhran upa 3,082 an awm bawk.

Financial year kal mekah April 2016 aṭanga February 2017 thlengin Rs. 3,95,691,560 an hmu tawh a, chu chu target Rs. 4,50,796,000 aṭangin 87.78% a ni.