Kohhran Hmeichhe Inkhawmpui a ṭiak

Presbyterian Kohhran Hmeichhe Inkhawmpui Lian vawi 47-na, March 10, 2017-a ṭan chu nizan khan a ṭiak. Inkhawmpui hian Mizoram pum huapa faina leh thianghlimna lama inzirtirna kalpui an rél.

Hmeichhe Inkhawm­pui Lianah hian Inrinni khan Serchhip Kawnpui biak-inah rorel inkhawm neih a ni a, chairman Rinchawii'n kaihruaiin, rorel palai 465 leh chhimtu 267 an tel.

Kum 2017 chhunga budget atan cheng nuai 33 an pawm a; an thurel dang zingah, Synod Hospital ṭanpui nan inkhawm vawi khat thawhlawm pek leh Synod Hospital-a Grace Home ṭanpui nan vawi khat inkhawm thawhlawm pekte a tel.

Inrinnia rorel in­khawm neih chhungin pandal-ah inkhawm buatsaih niin, Silsuri-a missionary Lalbiakliani'n thuchah a sawi a, zan inkhawmah Kohhran Hmeichhe chairman Rin­chawii'n thu a sawi.

Inkhawmpui thupui, 'I Pathian tawk turin inpeih rawh' tih chu speaker Upa C Ngurthantluanga'n nimin chawhma, chawhnu leh zanah in­khawm­ah a sawi. Nimin chawhma inkhawm­ah Kristian chhung­kaw dinhmun tehnaa tiṭhate hnenah chawi­mawina hlan a ni bawk.

Report-a a lan danin, Mizoram Synod hnuaia pastor bial 197-ah Koh­hran Hmeichhia 818 awmin, member 1,72,655 an awm. Inkhawmpuiah hian Inrinni thlenga palai riak lut inziak lut zat chu 9,087 an ni.

Kum 2017-19 chhunga hruaitu turte
Chairman K Lalliantluangi (Chaltlang Bial, Synod ruat)
Vice Chairman Lalnuntluangi (Electric Veng Bial)
Secretary H Lalpianthangi (Bawngkawn Bial, Synod ruat)
Assistant Secy. Lalmuanzuali (Zemabawk Bial)
Treasurer Lalrinpuii (Dawrpui Bial)
Finance Secy. Lalbiakhluni (Ramhlun North Bial)