KHAWTHLIR

Thisen pe
Khatla North Branch KṬP-te chuan KṬP Day pualin Inrinni khan an Kohran Hall-ah Synod Hospital tan thisen unit 32 an pe a, a petute mipa 29 leh hmeichhia pathum an ni.

Ganja leh heroin
Excise & Narcotics department-a Anti Narcotics Squad chuan, March 10, 2017 zan dar 8 khan Rangvamual Mel 4-ah ganja kg. 54.4 leh a neitua puh Moses Lalhruailiana (19) s/o David Lalthanzauva, Rangvamual Mel-3 nia insawi an man. March 11 chawhma dar 10:15 khan Rangvamual Mel 3-ah heroin gram 11 leh a neitua puh Zosangzuali (43) w/o Rundingliana, Rangvamual Mel 5 nia inchhál an man bawk.

Biometric enrolment
January 7, 2017 thleng khan Mizoramah Biometric Enrolment hnuaia inziak lut tawh zat Aizawl district-ah an tam ber a, 68.98% an inziak lut tawh. District danga Biometric Enrolment-a inziah luh dan chu - Lungleiah 45.60%, Mamitah 45.60%, Champhaiah 44.79%, Kolasibah 44.79%, Serchhipah 53.31%, Siahaah 41.73% leh Lawngtlaiah 31.26% a ni.

Lok Adalat
Kolasib District Lok Adalat chu Inrinni khan Kolasib District Court-ah an ṭhu a, thubuai 45 an ngaihtuah. Thubuai 45 zinga 17 an chingfel a, leiba ṭhìnna aṭangin Rs. 92,000 an hmu. An thubuai ngaihtuahte hi leiba ṭhinna 35, ram buai pali leh criminal case pathum a ni.

MPF thlâwp
MPC party ṭhalaite chuan thuchhuah siamin, Mizoram People Forum (MPF)-in Mizoramah inthlanna thianghlim leh fel a awm theih nana hma an la chu lawmawm an tih thu leh an thlawp tlat thu an tarlang. "MPF-te'n kum 2018 MLA inthlan lo awm turah inthlanna thianghlim leh ṭha kan neih theih nana an ṭanlaknate hlawhtling taka hlenchhuah a nih theih nan Mizoram mipui leh political party tinte zâwm ngei turin kan ngen a ni," an ti.