Two wheeler taxi permit 222 pe tawh

State Transport Authority thutlukna angin Aizawlah two wheeler taxi tlantir mek a ni a, February 2017 tàwp thleng khan two wheeler permit 222 pek a ni tawh.

Transport department hotute sawi danin, two wheeler taxi permit hi June 21, 2016 aṭangin dil theih hun hawn a ni a, kumin February thla tawp thleng khan permit 222 pek chhuah ni tawhin, chu'ng zinga mi 147 chuan permit an la chhuak tawh. Hetih lai hian, two wheeler taxi service tawh zat chiah hriat theih a ni lo.

Two wheeler taxi atan hian a tirah chuan kum hnih aia la rei lo hman tura tih a ni a, mahse, December 2016-a STA ṭhukhawm chuan kum ngaah a pawt sei a ni. Engine chu 150cc aia tê lo a ni tur a ni a, chhiah leh thil ṭul pawimawh hrang hrang, sumdawnna lirtheiina an tih ṭhin ang zawng zawng an tiha an zawm ve vek a ngai.

Registration number plate pawh rawng eng (yellow)-ah a duma ziah tur a ni a, lukhum (helmet) pawh ISI chuang, a eng (yellow) hman tur a ni.

Permit chu kum nga atan pek phawt a ni a, kum nga hnuah hman zui tlak a la nih chuan kum nga dang pawhsei theih a ni. Chuan man chu km. khatah Rs. 10 a ni a, km. khat aia thuiah chuan km. khatah Rs. 5 zelin a pung.

Two wheeler taxi mipa khalhah mipa leh hmeichhia an chuang thei a, hmeichhe khalhah chuan hmeichhia chauh an phur thei thung. Two wheeler taxi-te hi stand siamsak an ni lo a, hmun remchang lai apiangah an ding ve mai ṭhin. Two wheeler taxi neitu ṭhenkhat chuan, tlânna tur an hmu ve deuh reng a, ni khatah Rs. 600-1,000 vel an hlawh thei niin an sawi.