Bawlhhlawh hai ṭhinte ID card siamsak

Aizawl Municipal Corporation (AMC) chuan, Tuiriala bawlhhlawh paihna hmuna bawlhhlawh hâi ṭhinte chu March 10, 2017 khan identification card (ID card) leh safety gear an sem. ID card leh safety gear hlanna inkhawm hi AMC Site Office-a neih a ni.

AMC deputy mayor Lal­ringliana chuan, Tuiriala bawlh­hlawh paihna hmunah changkang leh awmze nei zawka bawlhhlawh sâwngbawl thuai a nih tur thu a sawi a; bawlhhlawh chhar chu thil ṭha ni lo mah se, ti lo thei lo an awm si avangin ṭha zawka enkawl a, an hriselna atan hmanruate pek an nih thu leh, AMC hriatpuina lo chuan bawlhhlawh chhar khawm khap a nih tawh a sawi.

Lalringliana hian bawlhhlawh hai ṭhinte tan hian kut kawr, hmai tuamna leh ID-te a hlan a; Tuiriala bawlhhlawh paihnaah hian bawlhlawh hâi ṭhin mi 100 vel an awm a ni. Bawlhhlawh hai ṭhinte chu bawlhhlawh hâl lo tura intiamtir an ni bawk.

AMC enkawl Tuirial dumping ground-ah hian ni tin Aizawl khawpui bawlhhlawh motor 100 velin an paih ṭhin a ni.