Inthlan result-ah Congress leh BJP party an lawm

Congress party leh BJP, Mizoram chuan thuchhuah siamin, tun hnaia state pangaa Assembly inthlan neih result, March 11-a puan takah an che ṭha nia tarlangin, lawmawm an tih thu an sawi.

MPCC chuan, BJP-in kum 2014-a Parliament inthlan aṭanga ram an lâk duai duai laia Manipur-a term thum sorkarna chelh mek Congress party-in party mal anga seat la hnem ber nihna a la hauh te, Goa-ah BJP an sorkar mek chunga Congress leh a thawhpuite’n seat an chang hnem zawk te, Punjab-a hnehna an chang theite chu an chhuan thu leh Pathian malsawmna a nih thu an sawi.

Inthlanna state panga zinga BJP chaknate chu Hindu kulmût, Hindu belt an tih state pahnih a ni tih sawiin, MPCC chuan, "Uttar Pradesh leh UP aṭanga indang Uttarakhand-ahte BJP-in hnehna an chang hi mak kan ti lo a, BJP hi chak ta lo se a mak hle zawk ang," an ti.

BJP chuan state panga inthlan result puan takah chuan an party-in hma an sawn hle tih sawiin, "Punjab leh Goa-ah chakna chang lo mah ila MP 80 awmna Uttar Pradesh leh MP panga awmna Uttarakhand-ahte hneh taka chakna kan chang te, kum 2012 a state assembly election a MLA pakhatmah kan neih lohna, Manipur-a MLA 21 kan nei tate ropui kan ti hle," an ti a, hnehna ropui tak changa an in ngaih thu an sawi.

Uttar Pradesh leh Uttarakhand-a Muslim leh Dalit hoten an tamna bialah BJP candidate hneh takin an thlang tling nia sawiin BHP chuan, "Hei hian mi ṭhenkhat­in BJP chu sakhaw tih bik nei, Hindu pawl ni anga an sawi thinna a dik loh zia a pholanna chiang takah kan ngai," an ti.