Grape wine man tuma kal an ni lo - Excise & Narcotics Minister

Excise & Narcotics minister Dr K Beichhua chuan, May 27, 2022-a Millennium Centre-a grape wine mantu Excise enforce­ment staff-te chu grape wine man tura kal an ni lo niin a sawi.

Nimina Kolasib District Veterinary Hospital a hawnnaah Kolasib thuthar thehdarhtute zawhna chhángin Dr K Beichhua chuan, ṭawngṭaimi ṭhenkhatin Dawrpui lûn lai takah zu leh ruih theih thil a hluar thu Chief Minister hnenah an thlen nia sawiin, "Chief Minister hian instruction min lo pe a, grape wine man tuma kal pawh kan ni lo," a ti.

END Minister chuan, grape wine zuartute'n ualau takin an lo zuar tih sawiin, "A phênah beer, whiskey leh Korean wine-te tam tak man tur a awm. A vaia man kha kan tih tur dik tak a ni tlat. Champhai wine chauh chu ni se inhriatthiam dan a awm dawn. Danah phal loh ni mah se, heti thleng kan inhrethiam a lawm," a ti a; a inziak lo lamah ngaihhnathiamna nen tun hun an thlen tawh thu a sawi.

Dr K Beichhua chuan, Cabinet-in MLP Rules zir chiangtu tur study committee a din thu sawiin, "Committee-ah hian Deputy Chief Minister hi chairman a ni a, kei hi vice chairman ka ni. Member-ah pawh CYMA, MHIP, MKHC-te ruat an ni," a ti a, minister lamah pawh Lalchhandama Ralte, Lalruatkima, TJ Lalnuntluanga leh Dr Thiamsanga te chu ex-officio atan ruat an nih thu a sawi.

Committee chuan inràwn­khawmna an nei a, kohhran lam chuan zu zawrh ṭha an tih loh laiin grape wine chungchangah chuan meeting neia a hranpaa ngaihtuah an nih loh thu an sawi tih sawiin K Beichhua chuan, "Kohhran lamin ngaihdan an sawi theih mai loh thu an thlen a ni. CYMA erawh chuan 5% alcohol tel wine chu rem an tih loh thu an sawi thung," a ti.

END Minister chuan, MLP draft rules chu Cabinet-ah thlen leh a nih thu sawiin, "Tun dinhmunah wine hi Rules-ah chuan telh lo ang u tih kha kan thutlukna a ni," a ti a; alcohol chu eng percent pawh ni se, khap hmiah a nih thu a sawi.

Minister Dr K Beichhua hian May 27-a grape wine man ni tlai khan Vanglaini palai zawhna chhangin, grape wine leh Korean wine-te pawh langsar tak taka zawrh a nih thu an dawn thu leh dan phal loh leh khap a nih ang ngeiin grape wine-te chu man a nih thu a lo sawi tawh a, "Dan phal loh thil a ni a, ualau taka zawrh a ni hi a dik lo hrim hrim," a ti.