Health Care Scheme sum harsatna Sorkar laipui hotute hnenah thlen

Minister Dr R Lalthangliana chuan sorkar laipui hotute a dawr chhunzawm a, May 2, Ningani khan Finance secretary Dr TV Somanathan chu a pisaah hmuin, Mizoram State Health Care Scheme (MSHCS)-a sum harsatna awm mek chungchang a thlen.

MSHCS harsatna tawh mek chungchangah hian Dr R Lalthangliana chuan, Asian Development Bank (ADB) loan beisei mekah Finance Ministry lama chinfel ngai la awmte a sawi lang a; TV Samanathan chuan theihtawp chhuaha a rang lama enfel dan a zawn tur thu a lo hrilh. ADB loan buaipuitu Rajat Kumar Mishra, Economic Affairs additional secretary hmuin, Mizoram HCS a sawipui bawk.

Commerce & Industries minister R Lalthangliana chuan Ports, Shipping and Waterways minister Sarbananda Sonowal chu a pisaah a kâwm a; Kawrpuichhuah-Thekamukh inkar inkalpawhna tur lei dawh tura tih chuan hun a la mamawh deuh dawn avangin tun atana hman lailâwk tur cargo ship vessel (bungraw phur lawng tênau) mamawh a nih thu ziakin a thlen. Sonowal chuan official-te be nghalin, a rang thei ang bera Mizoramin a hman theih tur lawng ngaihtuahsak turin a hrilh nghal niin sorkar thuchhuah chuan a tarlang.

Dr R Lalthangliana hian nimin khan Ministry of Commerce & Industries hotute a kâwm a, Silsuri leh Indo-Bangladesh border hmun hrang hranga border haat siam chungchang a sawipui a ni.