PWD leh YMA thawhhona tihtawp duh thu Serchhip YMA-in CYMA nena ṭhutkhawmah an sawi chhuak

Nimin khan Central YMA hruai­tute leh YMA sub-head­quarters hrang hrang hruaitute CYMA pisaah an ṭhukhawm a; Serchhip Sub-Hqrs. YMA hruaitute chuan, YMA leh PWD thawh dunna thuthlung awm mek chu tihtawp an duh thu an sawi.

Serchhip Sub-Hqrs. YMA hruaitute hnen aṭanga Vanglaini thu dawn danin, ṭhutkhawmah hian PWD leh YMA thawhhona tihtawp an duh thu leh thawhho tawh loh an duh chhan hrang hrang an sawi a; thutlukna erawh siam a ni lo.

Serchhip Sub-Hqrs. YMA hian April 2020 khan Serchhip auditorium-ah rorel inkhawm an nei a, chuta an rorel zingah chuan, 'YMA leh PWD thawhho­na thuthlung hi tihtawp a nih theih nan hmalak ni rawh se,' tiin an rêl.

Serchhip Sub-Hqrs. YMA-te hian an inkhawmpuiah hian, YMA leh PWD-in June 14, 2018-a thawhhona thuthlung an lo ziah tawh chungchang an sawiho a, PWD leh YMA thawh dunna hnuaia harsatna an tawhte an sawi lang.

Hnathawh ṭhenkhatah agreement an hmuh ve theih ṭhin loh thu te, hnathawh vil kawngah PWD-in harsatna an siam zawk ṭhin nia an hriat thute, joint inspection neih an rawt ṭhinte pawh tihhlawhtlin a nih ngai loh thute sawi a ni.