Dâk chungchanga mipui harsatnate MP-in Post Master General a hrilh

Lok Sabha MP C Lalrosanga chuan nimin khan Aizawl Dak Inpui a tlawh a, North East-1 post master general Joseph Lalrinsailova kâwmin, dâk hmanga mipuiin thil chi hrang hrang an inthawn ṭhinte a thlen har ṭhin avanga harsatna leh thil pawi thleng ṭhinte a ngaimawh thu a hrilh.

C Lalrosanga chuan, "Thil dawn mai tura ngaih tlai taka a thlen avanga tih tur pawimawh ṭhulh phahnate a lo awm ṭhin a, hei hi pumpelh dan ngaihtuah a, hmasawnna lam pan a ṭul," a ti a; Delhi leh Aizawl inkara thil thawn kal muang lutukah a muanna lai nia ngaih Kolkata-a Chief Post Master General, West Bengal Circle hnenah lehkha a thawn tawh thu a sawi.

Lok Sabha MP chuan, Lengpui Airport-a cargo terminal awm lo chu a ngaimawh thu a sawi a; cargo terminal chungchangah Airport Assistant Director a sawipui tawh bakah, Delhi lamah pawh bawhzui zel a tum thu a sawi bawk.

Joseph Lalrinsailova pawhin thil thawn kal muang chu a ngaimawh thu sawiin, "Lengpui Airport-ah cargo terminal a awm loh avangin kawngpuiah thil thawn zawng zawng kalpui a ngai a, Aizawl-Silchar inkarah ni khat a thang a, Silchar-ah ni khat dang an lo dah leh a, chumi zawhah Silchar-Guwahati thlen nan kar khatte an hmang leh a, chuvang chuan Aizawl-Delhi hi kal chak ngaihna a la awm lo," a ti a; Aizawl - Kanhmun, Kanhmun - Agartala, Agartala - Delhi kawnga thawn turin ruahmanna an neih mek thu a sawi.

Post Master General chuan, Aizawl Head Office-ah bik bungrua thleng reng reng a chak thei ang bera pek chhuah a nih tawh thu te, thil thawn bo chungchang te, a thawntuin báwma a dah ni miah lo, thil danga thlak thleng hriat tur a awm ṭhin thute sawiin, "Hemi chungchangah hian a ṭul anga hmalak mek a ni," a ti.

Lengpui Airport-a cargo terminal a awm loh avanga an harsatna an tawh ṭhin chungchangah, hma laksak turin Post Mater General chuan Lok Sabha MP a ngen a ni.