Bicycle Day-ah Bicycle Rally buatsaih

Nimin June 3 kha World Bicycle Day a ni a, he ni pual hian Sports & Youth Services department, National Service Scheme (NSS) leh Nehru Yuva Kendra Sangathan (NYKS)-te chuan nimin zing kar khan Bicycle Rally an huaihawt a, SYS secretary Dr Lalrozama'n a vailiam.

Biclycle Rally hi Vanapa Hall kawtah ṭanin, Mizoram Cycling Association aṭangin cyclist 60 vel an tel a, Solomona Temple, Chawlhhmun thleng an tlân a ni.

Vanapa Hall kawtah rally-a telte vailiamna inkhawm neih a ni a, kaihruaitu state NSS officer Dr Zirlianngura chuan, rally chu India ramin independent a hmuh champha kum 75-na lawmna, Azadi ka Amrit Mahotsav puala buatsaih a nih thu a sawi.

National Health Mission director Dr Eric Zomawia'n thutawi sawiin, thirsakawr khalh chu rilru leh taksa hrisel nan a ṭangkai thu leh Mizote'n uar deuh deuh se a duh thu a sawi a; khuallian Dr Lalrozama'n thu sawiin duhsakna a hlan zawhah rally-a telte chu a vailiam. Solomona Temple kawtah inkhawm tawi neih leh a ni bawk.

World Bicycle Day pualin Serchhipah pawh Bicycle Rally huaihawt a ni a, India rama hmun 75-ah neih a ni bawk. Mizoram hmun dangah chuan kawng dangin hman a ni.