RS MP-in maichàm/pulpit aṭanga Roreltute sawisêl lo turin a chah

Rajya Sabha MP K Vanlalvena chuan Pathian ruat loh roreltu an awm ngai lo tih sawiin, Pathian ruat roreltute maichàm/pulpit aṭanga sawisêl fo tawh lo turin a ngen.

K Vanlanvena hian nimin khan MNF pisaa inkhawmah thu sawiin, "Pathian ruat loh roreltu an awm ngai lo a, tuna Zoram kaihruai tur hian Pu Zoramthanga hi Pathian ruat a ni tih hi kan sakhaw hruaitu ṭhenkhatte hian lo hria se ka duh. Hun a tih lohah chuan kan CM hi Pathianin a chawlhtir lo ang. Pulpit/ maichàm aṭang hian Pathian ruat roreltu hi sawisel fo tawh lo turin ka ngen a ni. Roreltute chu Pathian ruat an ni a, ruat ni ve lote'n sêl fo mah se, hman aṭanga vawiin thlengin Pathian ruat ngei an ni," a ti.

Inthlan hmain manifesto an nei a, SEDP pawh an sawi nasat thu sawiin K Vanlalvena chuan, “Kan manifesto leh SEDP kan intiamna tam tak bakah, development tam tak kan thawh tur pawh Covid avangin kan tihlawhtling zung zung thei lo. Covid chu awm lo se kan tih ngei tur, Covid avanga kan tih lohteah mipui hriatthiamna kan dil a ni,” a ti a; hripui léng lo se hna tam tak an thawh tawh tur thu a sawi.

Rajya Sabha MP chuan, Tlabung aṭanga lawng hmanga Kolkata kal pawhna tur Parliament-ah a nawr thu te, Lawngtlai district-ah Myanmar pawh tur kawngpui siam mek a nih thu te, Chin state khawpui aṭangin Pángkhua chu darkar 3 kal chauh a nih thu leh Pangkhua-Saisihchhuah kawng laih nan CM-in cheng vbc 70-80 vel a sawi chhuah thu te, Pûkzing-Silsuri kawng a tlang ṭêp tawh thute a sawi a; “Hripui léng karah Pu Zoramthanga kaihhruai sorkar hi a awm mai mai lo a ni,” a ti.