Ram nuam siam turin Congress party hi kan tling tâwk - Lalsawta

Congress party president Lalsawta chuan, an party chuan sorkar ngawr ngawr an tum lo a, sorkar ṭha siam turin an inbuatsaih zawk nia sawiin, ram nuam siam turin Congress party chu an tling tâwk niin a sawi.

Lalsawta hian nimin khan Congress Bhavan-a political session-ah thu sawiin, ram changkang zawkte chuan ram leh mipui hmangin ram nuam an siam tih a sawi a, "Keini pawhin ram leh mipui hmangin Mizoram hi nuam taka siam kan tum. He thil pahnih hmanga ram nuam siam turin Congress party hi kan tling tâwk a, Mizo mipuite pawh kan ring tâwk a ni," a ti.

MPCC President chuan, “MNF-te’n sorkarna an chang chhunzawm a nih chuan ‘Mizo ka ni’ tia kan lo inchhuan venate pawh boin, ‘Mizo ka ni’ tia sawi pawh thil zahthlak tak a ni thei a ni,” a ti a; MNF an sorkar leh a nih chuan Mizoram chu chênna tlâk lohah an chhuah mai a hlauhawm thu a sawi.

Lalsawta chuan, “Sorkar ngawr ngawr hi kan tum a ni lo a, sorkar ṭha siam turin kan inbuatsaih mek zawk a ni... Kum 2023-ah inthlan kan hmachhawn dawn a, kan sorkar ngei ngei a ngai a, Zoram mipui tan Congress sorkar hi a ṭul a ni,” a ti.

Sorkarna an siam huna an ngaih pawimawh hmasak ber tur chu environment chhe ta lutuk leh tuihna kám chak lutuk siamṭhat a nih thu sawii Lalsawta chuan, “Hetiang lamah hian rilru kan sên nasat a ngai a, development-a kan hmalakna hmasa ber tur chu environment-ah a ni,” a ti a; mihring rilru put hmang a pawimawh thu sawiin, rethei emaw, hausa emaw, moral tichhe zawnga awm lo tura hmalak a pawimawh thu a sawi.