Minister leh MLA zingah mi hming hawha zangnadawmna lâk tum an awm - BJP President

BJP, Mizoram Pradesh president Vanlalhmuaka chuan, Mizorama minister leh MLA zingah mahni hminga zangnadawmna la ngam lo, mi hming hawha zangnadawmna lak ṭeuh tum an awm nia sawiin, chu chuan Mizoram a ei chhiat mek thu a sawi.

Nimina BJP pisaa inkhawmah thu sawiin Vanlalhmuaka chuan, "Central minister pakhatin, 'Mizoramah kawng ṭha pek che u kan tum a, nimahsela, a ram neitu sorkar chuan kawng ṭha aiin compensation an duh a, hmalakna a chak thei lo,' tih min hrilh ṭhin a, a mualpho thlak hle. Mahni hminga compensation la ngam si lo, mi hming hawha compensation lak ṭeuh tum minister leh MLA-te hian kan ram min ei chhe mek a ni," a ti.

Vanlalhmuaka chuan, Narendra Modi kaihhruai sorkar laipui chuan kum riat chhunga India rama hmasawnna a thlen ang chu Mizoramah pawh thleng ve se tih chu an duh ber a ni tih sawiin, “Kum 2023 MLA General Election lo awm turah chuan Mizoramah hian BJP telna sorkar a awm ngei dawn. Chutiang a thlenna tur erawh chuan BJP member-te kan pawimawh hle,” a ti a; BJP hmalakna leh a hnathawhte mipui hnenah an tlangaupui zel a ngaih thu a sawi.

Mizoram BJP President chuan, ADC-ah MNF-in sorkarna an chan apiangin ADC sorkarah buaina a thleng zel tih sawiin, “A pawi hle. MNF an sorkar hian Constitution-in awmzia a nei ṭhin lo a, chu chu a pawi tak zet. Inkaihhruaina mumal awm hlei thei lo, dan pawngsualna hi ramin a chhiat phah ṭhin a ni,” a ti.