KHAWTHLIR

Thisen pe
Zemabawk Higher Secondary School NSS unit chuan nimin khan an sikulah thisen pek an huaihawt a, Civil Hospital, Aizawl tan thisen unit 60 an pe a, petute mipa 42 leh hmeichhia 18 an ni.

CS zin a rawn haw
Chief secretary Dr Renu Sharma chu zan thum thanga New Delhi lama a zin hnuah nimin khan Aizawlah a rawn haw.

Environment Day Pualin hun hmang
Johnson College-a Ecology Club chuan World Environment Day (June 5) thleng tur pualin nimin khan an college campus-ah hman khat daih sarâng (single use plastic) ṭhat lohzia inzirtirna hun an hmang. He hunah hian zirtirtute leh zirlaite an tel a, auhla (slogan) hmangin an au rual bakah, an college hmunhma tifaiin an hnatlang a ni.

PUC Grad Dinner
Pachhunga University College chuan nimin khan an college aṭanga zirlai chhuak tur mi 849-te pualin college auditorium-ah Grad Dinner an buatsaih. PUC aṭanga zirlai chhuak turte chu BA-ah mi 453, B.Sc.-ah 258, B.Com.-ah 58, BBA-ah 37 bakah, MA leh M.Sc.-ah mi 43 an ni.

Tanpuina sem
Mission Foundation Movement chuan nimin khan Reiek convention hall-ah ṭanpuina sem inkhawm an buatsaih a, chhungkaw 60 hnenah tuizem, bawng, sangha no, dekchi, tui pipe leh hna thawhna hmanrua chi hrang hrang an sem. MFM hian Reiek RD block-ah entrepreneurship programme an kalpui a, nimina ṭanpuina an sem hi cheng nuai 33 hû a ni. A hmaa an lo sem tawhte nen chhungkaw 300 hnenah ṭanpuina an sem tawh a ni.

Speaker-in hmanpui
Ṭamdil Group YMA chuan nimin khan Thanglailungah inkhawmpui an hmang a, Assembly speaker Lalrinliana Sailo in a hmanpui. Lalrinliana chuan, YMA member-te chu mi dang tana malsawmna thlentu nih tum ṭheuh turin a sáwm. Ṭamdil Group-ah hian YMA branch paruk an awm a ni.

Invên dan inzirtir
Khawzawl District Disaster Management Authority bultumin nimin khan Khawzawl Electric Veng YMA Hall-ah kângmei laka invên dan inzirtirna, Seminar on Fire Safety Sensitization buatsaih a ni a, district bawrhsap CC Lalchhuangkima’n a hmanpui.

Tlân khap rih
Aizawl Traffic SP Rodingliana Chawngthu chuan, Govt Complex kawng thar (Bethel Road) / RB Point chu leimin leh in chim mai hlauhthawnawm a awm avangin 407 truck leh a aia lian lirthei tan tlân tlang phal a nih loh thu a tarlang.

Puanthui khawl sem
Rural Development minister Lalruatkima chuan nimin khan Thingdawl community hall-ah Thingdawl RD block chhunga self help group-te hnenah puanṭhui khawl a sem a; village organization 23-a SHG pariat hnenah community fund cheng nuai 47.5 leh SHG paruk hnenah cheng nuai 5.53 a sem bawk.

Covid-19 vei thi
Covid-19 vei enkawl lai Biakkimi (56), Khanpui chu June 2, Ningani chawhnu dar 2:40 khan State Referral Hospital-ah a thi a, Mizorama hripui vanga thi 699-na a ni. Biakkimi hi April 26, 2022 khan SRH-ah dah luh a ni a, natna dang nei tel a ni tih sorkar thuchhuakin a tarlang.