Mipui tibeidawngtu ni lo turin ZPM an inchah

ZPM president Lalliansawta chuan, an party thil tumte theihnghilh lo tur leh ram siamṭha tura mipui beiseina tibeidawngtu ni lo tura inbuaisaih zel turin an mite a chah.

ZPM Planning department chuan nimin khan Tourist Lodge, Chaltlangah ZPM Campaign Strategy Development Workshop an buatsaih a, ZPM working president K Sapdanga'n kaihruaiin, president Lalliansawta'n thu a sawi a ni.

Lalliansawta chuan, ram rorelna ṭha zawk siam turin an inbuatsaih mek tih sawiin, "Mipuite rintlak sorkar siam tur chuan taimakna, thuawihna leh rinawmna hi innghahna atan kan hman tlat a ngai," a ti.

ZPM President chuan an thil tum pasarih - kalphung thar, mipui sorkar siam, ram, hnam leh sakhaw himna tura beih, rorelna dik a awm theihna tura thawh, sorkar leh party-ah a huhoa rorelna lantir, Zo fate rorelna pakhat hnuaia dah tura beih, Zo nun mawi chawi nung zel tura theihtawp chhuah, ram rorelnaa Pathian ram tun dinte hi kan party innghahna leh kan tlangaupui tur a ni,” a ti.

ZPM chu a din tirh aṭangin kohhran hruaitu leh rawngbawltute nena din a nih thu sawiin Lalliansawta chuan, “A din tirha phûr leh thatho taka min ṭawiawmtute duh dan leh rilru kal pêl daiha khawsak hi a hlauhawm a, he ram siamṭha tura mipui min beiseina tibeidawngtu ni lo turin i inbuaisaih zel ang u,” a ti a; ṭawngkam, chezia leh rilru sûkthlêkah mi dang tana rimtui ni tur leh rilru zau tak, inhawng tak pu turin a chah.

ZPM President chuan, mahni inngai ropui hman an ni lo tih sawiin, “Tláwm tak, dik tak, ram leh hnam tana mahni ral zel ngam nun nei turin ka sawm che u. Thuawihna, taimakna nen kan kal zel ang. Kan ram hi nasa taka hmasawn ngai kan ni a, kan hmabak kawng a la thui a, tih tur kan ngah hle a ni,” a ti.