Grape chíngtute harsatna chingfel turin PC President-in Mizoram sorkar a phût

PC party president Lalhmangaiha Sailo chuan, dimdâwina tel miah loa kut hnathawktute chunga sorkar hmalakna demawm a tih thu sawiin, a rang thei ang bera grape grower society-te harsatna chinfelsak turin Mizoram sorkar a phût.

June 2, Ningani khan PC President leh Mizoram Grape Grower Society hruaitu Francis Lalmalsawma Sailo te an inkâwm a; PC President chuan, Mizoram sorkarin vawi leh khata kut hnathawka eizawngte intunnunna sum hnár a chhutchhiatsak chu àwm lo a tih thu sawiin, "Dimdawina tel miah loa kut hnathawktute chunga sorkar hmalakna hi a demawm a, a rang thei ang bera grape chíngtute harsatna chinfelsak turin sorkar ka phût a ni," a ti.

Lalhmangaiha Sailo chuan, "Champhai leh Hnahlan winery-a wine siamte hi Mizoram chhung leh páwnah awmze nei taka dan hnuaia zawrh a nih theih nan Mizoram sorkar hi Wine Rules siama hmang turin kan phût a ni," a ti a; grape wine hralh chhuah chungchangah Champhai leh Hnahlana kut hnathawktute'n harsatna an tâwk chu pawi an tih thu a sawi.

Champhai leh Hnahlana grape chíngtute chu duhsakna nen thlir a, an thawhrim rah aṭanga hlâwkna an hmuh theih nan an wine siam chu Mizorama hralh chungchangah harsatna siam lo turin Mizoram sorkar an ngen a, an phût tlat tih PC President chuan a sawi bawk.