MSSSB-in hnam dang pathum an la - NSUI, Mizoram

National Students Union of India (NSUI), Mizoram State chuan, “Party mite induhsakna atana din Mizoram Subordinate Services Selection Board (MSSSB)-in tun hnaia a hna lakah hnam dang (general category) mi pathum lâk a ni,” an ti a; chumi chungchangah chuan nimin khan MSSSB chairman Ramhmangaiha Ralte an hmu.

NSUI chuan, tun hnaia MSSSB-in sorkar hna thawk tur a lakah MPSC angin invênna ṭha a nei lo a, DPAR-in a duhsak zawngte an luh theih nan MSSSB chu guidlines a siamsak tawp niin an sawi a, “Guideline hnuaiah hian hnam dangte pawhin an dil thei. Party mite leh hnam dang (general category) duhsak zawngte lak theihna guideline hi a rang lamin MNF sorkar hian ennawn a, criteria mumal tak siam turin sorkar kan phût a ni,” an ti.

DPAR-in MSSSB tana guidelines an siam chu ram leh hnam tan a him lo nia sawiin NSUI chuan, “Mizo ṭhalaite tan a huatthlalaawmin hnam dang duhsakna kawng zau tak a inhawng a ni,” an ti a; hnam dangte tan kawng zau tak hawn ai chuan MPSC chu thuam chaka hna tam zawk la tura buatsaih ni se an duh thu an sawi bawk.