Kolasib-ah Veterinary Hospital hawng

AH&Vety minister Dr K Beichhua chuan nimin khan Kolasib District Veterinary Hospital a hawng. Minister chuan, hri léng avanga hun khirh tak karah Mizoram sorkarin theihtawp a chhuah thu sawi.

Dr K Beichhua chuan, ran enkawl kawngah an ṭhangharh chho mek tih sawiin, “Mihring leh ran hi inthlun zawm tlat an nih avangin mihring hriselna atan kan ran vulh leh a enkawltute kan hrisel tawn a pawimawh. Hei vang hian veterinary science hlutna a sang chho zel a ni,” a ti.

District parukah vety hospital thar an hawn tawh thu sawiin Vety Minister chuan, “Champhai district-ah pawh sak zawh thuai beisei a ni,” a ti a; district thar pathum tan pawh sak theih thuai a beisei thu a sawi.

Kolasib Veterinary Hospital hi NABARD-RIDF XXIV sum hmanga sak niin, sak nan cheng nuai 150 ruahman a ni a; October 2019-ah sak ṭan niin, a dung ft. 75 leh a vâng ft. 39 a ni.