Covid-19 vei enkawl lai 101 chiah an awm

Mizoramah nimin tlai khan Covid-19 vei inenkawl lai mi 101 chiah an awm a, chu chu positive hmuh tawh zawng zawng 2,28,372 aṭangin 0.04% chiah a ni.

June 2, Ningani khan Mizoramah Covid-19 vei mi 20 hmuh chhuah a ni a, June 1-a hmuh chhuah zat aia a tam hret bakah positivity rate a sang hret. Nimin khan hripui vei dam tawh mi 18 chhuahtir an ni a, Covid-19 vanga thi an awm lo a, June 2, Ningani khan mi pakhat a thi.

Ningania Covid-19 positive hmuh chhuah tharte chu mipa leh hmeichhia 10 ve ve an ni a; Rapid Antigen Test hmanga hmuh chhuah vek niin, positivity rate 7.02% a ni.

IDSP record angin, Mizoramah Covid-19 vei 2,28,372 hmuh chhuah a ni tawh a, mipa 1,06,326 leh hmeichhia 1,22,046 an ni a, mipa aiin hmeichhia 15,720-in an tam zawk. Nimin tlai dar 5 thleng khan mi 2,27,572 (99.65%) chhuahtir an ni tawh a, mi 699 (0.31%) thi tawhin, enkawl mek mi 101 (0.04%) an awm.

Nimin tlai dinhmun angin, Mizoramah hripui vei enkawl lai tamna ber Aizawl district-ah mi 34 an awm a, district pahnih - Siaha leh Lawngtlai district-ah hripui vei an awm tawh rih lo.

Kum 2011 chhiarpui aṭanga chhûtin, Covid-19 positive hmuh tawh zat 2,28,372 chu mi 1,000 zelah positive 208 an awm ang a ni a, mihring 1,00,000 zelah hripui vangin mi 63 an thi tawh ang a ni bawk.